قەندیل پرێس
ڕۆژی شەممە ۱ی خەرمانانی ۱۴۰۵، ئاتوسا جەعفەری، ژنی گەنجی ۲۷ ساڵە و کارمەندی ئیدارەی پۆستی سنە، لە کاتی چوون بۆ سەر کارەکەی لەلایەن هاوسەری پێشوویەوە بە چەقۆ هێرشی کرایەسەر و گیانی لەدەست دا.
بەگوێرەی ڕاپۆرتە بڵاوکراوەکان، ناوبراو لە ناوچەی گشتی و لە کاتی سواربوونی بە ئۆتۆمبێلەکەی لە پشتەوە دراوەتە بەر چەقۆ و بەهۆی قورسی برینەکان و خوێنڕێژیی تووندەوە، گیانی لەدەست داوە.
بکوژ دوای تاوانەکە هەڵاتووە و پۆلیس هێشتا دەستبەسەری نەکردووە.
ئاتوسا جەعفری چەند ساڵ پێش ئێستا بەهۆی کێشەی خێزانی لە هاوسەرەکەی جیا ببوەوە، بەڵام لەو ماوەیەدا بەردەوام لەلایەن هاوسەری پێشوویەوە هەڕەشەی لێ کرابوو و ئازار درابوو.
ئەمەش لە کاتێک دایە لە ماوەی ڕۆژانی ڕابردوودا ژنێکی دیکە لە سەقز لەلایەن هاوسەری پێشووی درایە بەر چەقۆ و کوژرا، هۆکاری سەرەکیی دووبارەبوونەوەی ئەم جۆرە کارەساتانە لە کوردستان بوونی کەلێنە یاساییەکان و نەپاراستنی قوربانییانی تووندوتیژیی خێزانییە.
