قەندیل پرێس
قهندیل پڕێس- ڕاپۆرتی تایبهت
ئیکرا ئاڤجی، ئەو پەرستارە کوردەی کە لە شاری کۆجایلی تورکیا خزمەتی دەکرد، لەسەر بڵاوکردنەوەی ڤیدیۆیەکی چنینی قژی وەک کاردانەوە و پشتگیرییەک بەرامبەر بە نمایشکردنی پرچی بڕاوی ژنە جەنگاوەرێک کە لە سوریا گیانی لەدەست دا، کەوتە بەر هێرش و لێپرسینەوە. سەرەڕای ئەوەی لە ڕێککەوتی 21ی ئایاری 2026 لەلایەن دادگاوە بە تۆمەتی پڕۆپاگەندەی ڕێکخراوەیی بڕیاری بێتاوانی بۆ دەرچوو، بەڵام دۆسیەکە لە ڕووی کارگێڕییەوە نەدراوە و فشارەکان بەردەوام بوون.
لە ڕێککەوتی 19ی ئابی 2026، ئیکرا ئاڤجی بە فەرمی ڕایگەیاند کە لەلایەن وەزارەتی تەندروستی تورکیاوە و لە ڕێگەی بڕیاری لیژنەی دیسپلینەوە بۆ هەمیشە لە پیشەی پەرستاری و فەرمانبەری دەوڵەت دوورخرایەوە.
ناوبراو وێنەیەکی خۆی لە بەردەم وەزارەتی تەندروستی لە ئەنقەرە بڵاوکردەوە و باسی لەوە کرد کە سەرەڕای بێتاوانبوونی لە دادگا، بەڵام بەهۆی دەربڕینی هەڵوێست دژی توندوتیژی و کوشتنی ژنان، پیشەکەی لێ سەندراوەتەوە.
ناوبراو لە پەیامەکەیدا جەختیکردەوە کە بێدەنگ نەبووە لە بەرامبەر کوشتن و توندوتیژی دژی ژنان و ڕایگەیاند کە بۆ ناڕەزایەتی بەرامبەر توندوتیژی و کوشتنی ژنان قژی چنیوە، بەڵام باجەکەی بۆ ئەو لەدەستدانی پیشەکەی بووە.
هەڵوێستی دەم پارتی، تۊلای هاتیمۆغوڵڵاری هاوسەرۆکی دەم پارتی بهتوندی بڕیارەکەی شەرمەزار کرد و داوای کرد کە ئیکرا ئاڤجی دەستبەجێ بگەڕێنرێتەوە سەر کارەکەی. هاتیمۆغوڵڵاری ئاماژەی بەوە دا کە ئیکرا پەرستارێک بووە کە بێ جیاوازی زمانی نەتەوە و ڕەگەز خزمەتی خەڵکی کردووە و دوورخستنەوەی لەسەر بنەمایەکی سیاسی و نادادپەروەرانە بووە.
ڕاگەیەندراوی مەجلسی ژنانی دەم پارتی، لە بەیاننامەیەکدا جەختیان لەوە کردەوە کە هۆنینەوەی کەزی لەلایەن ئیکراوە هێمایەکی دروست بۆ پشتگیری و پەیوەندی و تێکۆشانی ژنان بووە و دەبێت ئەم بڕیارە ستەمکارانەیە هەڵوەشێندرێتەوە.
پارێزەرانی ئیکرا ئاڤجی ڕایانگەیاند کە سەرەڕای بڕیاری وەزارەت، دۆسیەکەیان بۆ دادگای کارگێڕی تێهەڵچوونەوە بەرز دەکەنەوە بۆ ئەوەی مافە پیشەییەکانی بۆ بگێڕرێنەوە.
