قەندیل پرێس
قەندیل پرێس
لە درێژەی پێشێلکارییە ئەمنییەکان لە ناوچە کوردییەکان، هێزێکی پۆلیسی جنایی سەر بە هێزەکانی ئەحمەد شەرع هەڵیانکوتایە سەر ماڵی خێزانێکی کورد لە گەڕەکی شێخ مەقسودی شاری حەلەب و کچە گەنجێکی تەمەن ١٩ ساڵیان بە ناوی (ئێڤا ختام بریم) دەستگیر کرد.
بەپێی ئەو زانیاریانەی دەست قەندیل پرێس کەوتوون، هێزە ئەمنییەکان دوای چوونەژوورەوە بۆ ماڵی ناوبراو، پشکنینی وردیان ئەنجام داوە و بەو کچە گەنجەیان ڕاگەیاندووە کە ئامانجی سەرەکیی هەڵمەتەکە دەستگیرکردنی باوکییەتی، کە عازفە (خەتام بریم) و مۆڵەتی گرتنی لەسەرە.
لە کاتی پشکنینی ماڵەکەدا، ئێڤا ختام بریم هەوڵی داوە پەیوەندییەکی تەلەفۆنی بە زمانی کوردی لەگەڵ باوکی ئەنجام بدات. ئەم هەڵسوکەوتە لەلایەن هێزەکان و مەفرەزەکانی هێزە ئەمنییەکانەوە بە هەوڵدان بۆ ئاگادارکردنەوەی داواکراو و تێکدانی ڕێکارەکان لێک دراوەتەوە. لەسەر ئەم بنەمایە، وێڕای پێشێلکردنی یاساکانی مافی مرۆڤ و سزادانی کەسوکاری پلە یەک، ناوبراویان بە شێوەیەکی نایاسایی دەستگیر کرد و بۆ بنکەی پۆلیسی جنایی لە شاری عەفرین گواستەوە.
سەرچاوە ئاگادارەکان ئاماژەیان بەوە داوە که لایەنە ئەمنییەکان بە ڕوونی بە کەسوکاریان ڕاگەیاندبوو کە ئازادکردنی ئێڤا بە تەواوی مەرجدارە بە خۆڕادەستکردنی باوکییەوە، ئەمەش وەک کارتێکی فشار و بارمتەگرتنی خێزانی بەکارهات.
ئەم هەڵسوکەوتە توندوتیژە و دەستگیرکردنی کچێکی گەنج لەسەر دۆسیەی باوکی، شەپۆلێکی بەهێزی نیگەرانی و ناڕەزایەتی لە ناو ناوەندە مەدەنی و چالاکوانانی مافی مرۆڤدا لێکەوتەوە. لە دوای تێپەڕبوونی چەند کاتژمێرێک بەسەر ڕووداوەکەدا، فشاری چڕی میدیایی، مەدەنی و جەماوەری خرایە سەر لایەنە بەرپرسەکان بۆ کۆتاییهێنان بەو پێشێلکارییە یاساییە.
لە ئەنجامی ئەو فشارە چڕە مەدەنی و جەماوەرییانەدا، هێزە ئەمنییەکان ناچاربوون لە بڕیارەکەیان پاشەکشە بکەن؛ بە جۆرێک کە دوای تێپەڕبوونی چەند کاتژمێرێک لە دەستبەسەرکردنی، ئێڤا ختام بریم بێ مەرج ئازاد کرا و گەڕایەوە باوەشی خێزانەکەی.
بەرپرسانی مەدەنی و چاودێرانی سیاسی جەخت لەوە دەکەنەوە کە بەکارهێنانی کەسوکاری داواکراوان وەک بارمتە بۆ ناچارکردنی کەسانی تر بە خۆڕادەستکردن، پێشێلکارییەکی زەقە دژی بنەماکانی مافی مرۆڤ و یاسا نێودەوڵەتییەکان، و پێویستە کۆتایی بەو جۆرە ڕفتارانە بهێنرێت لە ناوچەکەدا.
