قەندیل پرێس
قهندیل پرێس- ڕاپۆرتی بهدواداچوون و تایبهت
سەرەڕای ئەو دڵنیاییە فەرمییانەی کە لەلایەن فەرماندەیی پاسەوانی سنووری عێراق و بەرپرسانی سەربازیی سووریاوە دەدرێن سەبارەت بە سەقامگیریی و ئاساییبوونی دۆخی سنوورە هاوبەشەکانی هەردوو وڵات، بەڵام زانیاری و ئاماژە مەیدانییەکان و راپۆرتی دەزگا هەواڵگرییەکان دیمەنێکی بە تەواوی جیاواز و پڕ لە مەترسی دەخەنەڕوو کە پێشان دەدات دۆخی ناوچەکە بەرەو گرژییەکی سەربازیی گەورە هەنگاو دەنێت.
لەم چوارچێوەیەدا، زانیارییەکان باس لەوە دەکەن کە وەزارەتی بەرگریی سووریا لە هەنگاوێکی کتوپڕ و بێ ڕوونكردنەوەی فەرمیدا، فەرمانی کردووە بە خستنەگەڕی باری ئامادەباشی سەربازیی لە ئاستی جیم لەسەر سنوورەکانی لەگەڵ عێراق و یەکە سەربازییەکانی لەو ناوچەیەدا بڵاوەپێکردووە، ئەمەش هاوکاتە لەگەڵ داواکردنی دەستبەجێی گەڕانەوەی سەربازەکان بۆ ناو یەکە سەربازییەکانیان، کە ئەمەش نیشانەیەکە بۆ دروستبوونی مەترسییەکی گەورەی ئەمنی لە ناوچەکەدا.
ئەم پەرەسەندنە خێرایانە پاشخانێکی سیاسی و ئەمنی ئاڵۆزیان هەیە، بە جۆرێک کە سەرچاوە سیاسییەکان ئاشکرای دەکەن پێشتر لایەنی سووری بە شێوەیەکی فەرمی و ڕاستەوخۆ پەیامی هۆشداریی گەیاندووە بە بەرپرسانی عێراق سەبارەت بە بوونی جموجۆڵی گوماناوی و نائاسایی میلیشیاکانی لایەنگری ئێران لە نزیک هێڵی سنووری هەردوو وڵات، و دیمەشق بە توندی جەختیکردووەتەوە کە هەر ئۆپەراسیۆن یان هێرشێک لە خاکی عێراقەوە ئاراستەی سوریا بکرێت، بە شێوازێکی زۆر توند وەڵام دەدرێتەوە و بەرپەرچ دەدرێتەوە، کە ئەمەش مەترسیی پێکدادانی ڕاستەوخۆی سەربازی لەسەر سنوورەکان زیاتر کردووە.
لە لایەکی ترەوە، سەرچاوەیەکی باڵای سەربازی لە سوپای عێراق، سەبارەت بەم دۆخە مەترسیدارە بە قەندیل پریسی ڕاگەیاند، کە هێزە ئەمنییەکان و فەرماندەییە سەربازییەکان بە وردی چاودێری جووڵەکان دەکەن و دۆخەکە گەیشتووەتە قۆناغێکی هەستیار کە پێویستی بە رێکاری خێرا هەیە بۆ ڕێگریکردن لە هەر پەرەسەندنێکی نەخوازراو. ئەو بەرپرسە ئاماژەی بەوەش کرد کە ناوچە سنوورییەکان بە درێژایی 600 کیلۆمەتر کە سێ دەروازەی سەرەکی و ستراتیژی لەخۆدەگرێت، ئەوانیش دەروازەی رەبیعە لەگەڵ حەسەکە، دەروازەی قائیم لەگەڵ دێرەزور، و دەروازەی وەلید لە نزیک سێگۆشەی سنووری عێراق و سووریا و ئوردن، ئێستا بوونەتە گۆڕەپانی ململانێیەکی شاراوە و ئەگەری هەیە لە هەر ساتێکدا تەقینەوەیەکی گەورەی سەربازی لێبکەوێتەوە بەهۆی ئەو گرژییە توندەی کە لە نێوان هێزە جیاوازەکاندا دروست بووە.
کۆی ئەم گۆڕانکارییانە و بڵاوبوونەوەی هێزە سەربازییەکانی سووریا و هۆشدارییە توندەکانی دیمەشق بۆ بەغدا، دۆخی سنووری نێوان هەردوو وڵاتی خستووەتە سەر خاڵێکی مەترسیدار کە چاودێرانی سیاسی بە لێواری تەقینەوە وەسفی دەکەن، بە جۆرێک کە هەر هەڵەیەک لە سەربازگەکانی هەردوولا دەکرێت ببێتە فیتیلەی ئاگرکەوتنەوەیەکی گەورەی سەربازی لە تەواوی ناوچەکەدا.
