قەندیل پرێس
قەندیل پرێس
شێخان، پارێزگای دهۆک — ماوەی زیاتر لە 48 کاتژمێرە ئاگرێکی گەورە و فراوان لە چیای مەقلوب، لە سنووری قەزای شێخان لە پارێزگای دهۆکی هەرێمی کوردستان کەوتووەتەوە و تاوەکو ئێستا هیچ لایەنێکی فەرمی و تیمەکانی بەرگریی شارستانی بە هانای ناوچەکەوە نەچوون.
ئاگرەکە کە سات بە سات پەرە دەسێنێت و ڕووبەرێکی فراوانتر لە پوش و پاوەن دەسوتێنێت، مەترسییەکی جیددی بۆ سەر ژینگەی ناوچەکە دروستکردووە. بە گوتەی سەرچاوە خۆجێیەکان، جگە لە سوتانی هەزاران دار و پۆشاکی سروشتی، ئاگرەکە هەڕەشە لە چەندین شوێنەواری مێژوویی و دێرینی ناوچەکە دەکات.
لە کاتێکدا دۆخی ناوچەکە زۆر هەستیارە، بەڵام تا ئێستا هیچ دەزگا و لایەنێکی پەیوەندیدار ئاگرەکەیان بە هەند وەرنەگرتووە و، بە وتەی هاووڵاتییان، کەس خۆی لێ نەکردووە بە خاوەن تەنها ژمارەیەک گەنجی خۆبەخشی ناوچەکە نەبێت کە بە دەستووباڕی ڕووت و بە کەرەستەی زۆر سەرەتایی لە هەوڵی کۆنترۆڵکردنی بڵێسەکاندان پێش ئەوەی کارەساتێکی گەورەتری لێ بکەوێتەوە.
مامۆستا ڕەزوان زرار کە یەکێکە لەو گەنجە خۆبەخشانەی کە لە سەر هێڵی پێشەوەی کۆنترۆڵکردنی ئاگرەکەیە، لە لێدوانێکدا بۆ قەندیل پرێس نیگەرانی و ناڕەزایەتی خۆی دەربڕی و ڕەخنەی توندی لە کەمتەرخەمی لایەنە فەرمییەکان گرت و گوتی زیاتر لە 48 کاتژمێرە ئاگرەکە بەردەوامە و تا دێت فراوانتر دەبێت. ئێمە لێرە تەنها بە دەستی بەتاڵ و بە هاوکاریی چەند هاوڕێیەکی خۆبەخش شەڕی ئەم ئاگرە دەکەین. ئەو گەنجە خۆبەخشە ئاماژەی بەوەشدا جێگەی سەرسوڕمان و داخە کە تا ئێستا هیچ تیمێکی بەرگریی شارستانی یان لایەنێکی حکومی نەهاتوون بە هانامانەوە و ژینگەی ئەم چیا مێژووییە لەبەردەم چاوماندا دەسوتێت.
خۆبەخشانی ناوچەکە داوایەکی بەپەلە ئاراستەی لایەنە پەیوەندیدارەکانی حکومەتی هەرێمی کوردستان و بەرگریی شارستانی دەکەن کە بە زووترین کات تیم و کەرەستەی پێویست ڕەوانەی چیای مەقلوب بکەن بۆ کۆنترۆڵکردنی ئاگرەکە و ڕێگریکردن لە لەناوچونی زیاتری سروشت و شوێنەوارە مێژووییەکانی سنوورەکە.
