قەندیل پرێس
مامۆستا لوقمان ئەمینی، ئیمام جومعەی مزگەوتی چواریار نەبی شاری سنە، ئەمڕۆ دووشەممە ١ی بانەمەڕ، دوای بانگهێشتکردن و ڕۆیشتنی بۆ دادگای تایبەتی ڕۆحانیەتی هەمەدان دەستبەسەر و بۆ شوێنێکی نادیار ڕاگوێزرا.
ئەم كەسایەتییە ئایینییە دیارەی کورد کە پێشتر بە تۆمەتی پشتیوانی كردن لە خەڵک لە سەردەمی بزووتنەوەی “ژن، ژیان، ئازادی”دا بە ١١ ساڵ زیندان و لێسەندنەوەی جلوبەرگی ئایینی و دوورخستنەوە بۆ ئەردەبیل مەحکووم کرابوو، جارێکی دیکە بە بانگهێشتنامەیەک بانگهێشتی دادگا کرایەوە.
بنەماڵە و کەسوکاری مامۆستا ئەمینی لە بارودۆخ و شوێنی مامۆستا ئەمینی بێ ئاگان و ئەمەش نیگەرانیی سەبارەت بە چارەنووسی ناوبراو دروست كردووە.
