قەندیل پرێس
کەناڵی ئین بی سی نیوز بڵاویکردەوە، کە ئیسرائیل پلانێکی سەربازی بۆ هێرشکردنە سەر ڕژێمی ئێران ئامادە دەکات و بڕیارە نەتانیاهۆ داوای بەشداریی واشینگتن لەو هێرشانەدا لە ترەمپ بکات.
ئەمڕۆ میدیاکانی ئەمریکا بڵاویانکردەوە، نەتانیاهۆ لە کۆتایی ئەم مانگەدا لە فلۆریدا لەگەڵ ترەمپ کۆدەبێتەوە، لەو دیدارەدا ڕاپۆرتێکی ورد لەسەر مەترسییەکانی پەرەپێدانی موشەکی بالستیک و نۆژەنکردنەوەی دامەزراوە ئەتۆمییەکانی ڕژێمی ئێران پێشکەش دەکات.
بە پێی ڕاپۆرەی ئین بی سی نیوز، ئیسرائیل دەیەوێت واشینگتن ڕازی بکات کە ئەم هەنگاوانەی تاران هەڕەشەیە بۆ سەر تەواوی ناوچەکە و پێویستە ڕابگیرێت.
بەرپرسانی ئیسرائیل پێیان وایە ڕژێمی ئێران دەستی کردووە بە نۆژەنکردنەوەی ئەو ناوەندانەی پیتاندنی یۆرانیۆم کە پێشتر لە هێرشە ئاسمانییەکاندا کرابوونە ئامانج، هەروەها نۆژەنکردنەوەی سیستەمی بەرگریی ئاسمانی و کارگەکانی بەرهەمهێنانی موشەک بە مەترسییەکی خێرا دادەنێن.
ئاماژە بەوەش کراوە: نەتانیاهۆ دەیەوێت ترەمپ ڕازی بکات کە پێویستە بۆ پاراستنی بەرژەوەندییەکانی ئەمریکا و ئیسرائیل ڕێکاری سەربازیی خێرا بگرنەبەر.
پێشتر دامەزراوە ئەتۆمییەکانی ڕژێمی ئێران لە شەڕێکی ۱۲ ڕۆژەدا کرابوونە ئامانج، ئیسرائیل لەوە دەترسێت کە تاران توانا سەربازییەکانی بە خێرایی نۆژەن بکاتەوە.
