قەندیل پرێس
دۆناڵد ترەمپ، سەرۆکی ئەمریکا، بڕیارێکی جێبەجێکاری واژۆ کرد کە بەپێی ئەو بڕیارە تێچووی ڤیزای کارکردن بۆ کەسی بیانی لە جۆری H-1B بۆ 100 هەزار دۆلار لە ساڵێکدا بەرز کرایەوە. هاوکات کارتێکی دیکەشی بە ناوی “کارتی ئاڵتونی” بۆ مانەوەی هەمیشەیی لە ئەمریکا ناساند. ئامانجی سەرەکی ئەم گۆڕانکارییانە دابینکردنی هەلی کاری زیاترە بۆ هاووڵاتیانی ئەمریکی.
بەرزکردنەوەی تێچووی ڤیزای H-1B
سەرۆکی ئەمریکا تێچووی ڤیزای کارکردن (H-1B) بۆ ئەو کەسانە بەرزکردەوە کە بە ڤیزای کار دێنە ئەمریکا. ترەمپ رایگەیاند کە ئامانجی ئەوان هاتنی کەسانی زۆر شارەزایە بۆ وڵاتەکەیان، بەڵام لە هەمان کاتدا دەبێت پارە بدەن. ڤیزای جۆری H-1B، کە سەرەتا لە ساڵی 1990 راگەیەندراوە، رێگە بە کۆمپانیاکان دەدات کارمەندی بیانیی خاوەن توانای تایبەتی وەک (زانا، ئەندازیار، یان پرۆگرامساز) بهێننە ئەمریکا. ئەم ڤیزایە سەرەتا بۆ ماوەی سێ ساڵە، بەڵام دەکرێت بۆ شەش ساڵیش درێژ بکرێتەوە. پێشتر ساڵانە 85 هەزار ڤیزا لە رێگەی سیستمێکی دیاریکراوەوە دەبەخشرا، بەڵام ئێستا ئیدارەی ترەمپ کۆتوبەندی نوێی بۆ سەر بەرنامەکە داناوە بە جۆرێک هاتنی بیانی لەو رێگەیەوە سنووردار کراوە.
کارتی ئاڵتونی بۆ مانەوەی هەمیشەیی
لە بڕیارێکی دیکەیدا، ترەمپ “کارتی ئاڵتونیی” ناساند بۆ ئەو کەسانەی کە ئامادەن بڕی یەک ملیۆن دۆلار بدەن تاوەکو بتوانن مافی مانەوەی هەمیشەیی لە ئەمریکا بەدەستبهێنن. ئەم هەنگاوە وەک رێگایەکی نوێ بۆ وەبەرهێنان لە ئەمریکا و راکێشانی سەرمایە سەیر دەکرێت.
کاریگەری گۆڕانکارییەکان و ئامانجی ئابووری
هاوەرد لوتنیک، وەزیری بازرگانی ئەمریکا، دەڵێت ئەم گۆڕانکارییە وادەکات کۆمپانیاکان سپۆنسەری کەسە زۆر تایبەتەکان بکەن و لە بەرامبەردا راهێنان بە دەرچووە ئەمریکییەکان بکەن و هەلی کار بۆ ئەوان دابین بکەن. بەگوێرەی داتا کۆمپانیاکان، بۆ ئەمساڵ کۆمپانیای ئەمازۆن زۆرترین جار داوای ڤیزای H-1B کردووە کە ژمارەکەی 10 هەزار ڤیزا بووە، بەدوایدا راوێژکاری تاتا، مایکرۆسۆفت، ئەپڵ و گوگڵ دێت. لە وڵاتانیشدا هیندستان زۆرترین هاوڵاتی سوودی لەو جۆرە ڤیزایە بینیوە بۆ کارکردن لە ئەمریکا.
سنووردارکردنی خوێندکارانی نێودەوڵەتی
هەر لە بەشێکی دیکەی ئەم سیاسەتە نوێیەی سەرۆکی ئەمریکا، هاتنی خوێندکارانی نێودەوڵەتیش بۆ خوێندن لە ئەمریکا سنووردار کراوە. ئەمەش لە رێگەی قەدەغەکردنی هاوڵاتییانی ژمارەیەک وڵاتی دیاریکراو کە هەر سەردانی ئەمریکا بکەن و دانانی مەرجی قورسیش بۆ هاوڵاتییانی وڵاتانی دیکە.
