Hevseroka Daîreya Têkiliyên Derve ya Rêveberiya Xweser, Elham Ahmed, li ser hesabê xwe yê X daxuyaniyek belav kir û got:
«Perwerdeya bi zimanê dayikê, mafekî bingehîn ê her gelekî ye. Ziman xuluqkariyên Xwedayê dilovan in. Nabe ku bên qedexekirin an jî ji pîroziya wan bê kêmkirin.
Em bawer dikin ku Suriye bi qebûlkirina van mafên bingehîn re, dikare bibe nimûneya edalet û aramî û aştiyê li herêmê.»
Mezlûm Ebdî ragihand ku pêvajoya tevlîkirina saziyên leşkerî, îdarî û xizmetguzariyê ya Rêveberiya Xweser a nav saziyên hikûmeta Sûriyeyê bi dawî bûye û qonaxeke nû dest pê kiriye. Fermandarê Giştî yê Hêzên Sûriyeya Demokratîk (HSD) Mezlûm Ebdî bi cil û bergên Kurdî tevlî şahiya 100 saliya damezirandina bajarê Qamişloyê ya li Parka Azadiyê bû. Mezlûm Ebdî di şahiyê de axivî û diyar kir ku li gorî peymana destpêka îsal, pêkhateyên leşkerî yên HSDyê yên ku “bi xwîna şehîdan hatine avakirin” li gel dezgehên îdarî û xizmetguzariyê tevlî saziyên niştimanî yên dewleta Sûriyeyê dibin lê dê nasnameya xwe ya taybet biparêzin. Mezlûm Ebdî ji xelkê re got: “Pêvajoya tevlîkirina saziyên me yên leşkerî, xizmetguzarî û îdarî ya nav saziyên niştimanî yên dewletê bi dawî bû. Ji niha û pê ve pêvajoyeke nû dest pê dike.” Ebdî amaje pê kir ku li wan herêmên ku berê di bin kontrola Rêveberiya Xweser de bûn, saziyên nû bi navê dewleta Sûriyeyê tên avakirin. Wî her wiha xwest ku xelk xwedî li van saziyan derkeve çimkî ew “destkeftiyên şoreşê û qurbanîdana gel in.” Vekişîna hêzên parçeyên din Mezlûm Ebdî di axaftina xwe de bal kişand ser vekişîna hêzên ku ji parçeyên din ên Kurdistanê ji bo alîkariyê çûbûn. Ebdî got ku ew hêz li ser daxwaza HSDyê û li gorî peymanê vedigerin û anî zimên, “Em dikarin bibêjin ku îro li herêma me pêvajoyeke nû dest pê dike.” Fermandarê HSDyê tekez kir ku ew dê ji bo misogerkirina mafên gelê Kurd di destûra paşerojê ya Sûriyeyê de bi rêyên siyasî têkoşîna xwe bidomînin û vê têkoşînê xurttir bikin. Ebdî behsa pêkhateyên Qamişloyê kir û got: “Kurd, Ereb, Siryan, Asûr û Ermen zêdetirî 100 salî ye li herêma Cizîrê bi hev re dijîn.” Mezlûm Ebdî “siyaseta şovenîst a rejîma Beasê” rexne kir ku dixwest demografiya herêmê biguhere û ziman û nasnameyan qedexe bike. …
Qendîlprêss
