Qendîlprêss
Serokwezîrê Îsraîlê Benjamin Netanyahu hikûmeta demkî ya Sûriyeyê û Tirkiyeyê hişyar kir û got ku Îsraîl bi tu awayî qebûl nake ku hêzên leşkerî yên Tirkiyeyê li nav axa Sûriyeyê bicih bibin, ji ber ku ew vê yekê wekî gefek rasterast li ser ewlehiya Îsraîlê dibîne. Netanyahu got ku berê jî bi rêya kanalên cuda Şam hatibû hişyar kirin, lê li gorî wî berpirsên Şamê peyam baş negirtine. Wî diyar kir ku êrîşa roja sêşemê li Sûriyeyê ji bo gihandina vê peyamê bi awayekî rasterast bû.
Ev daxuyaniyên Netanyahu hevdem bûn bi serdana Sererkanê Artêşa Îsraîlê Eyal Zamir a herêmên başûrê Sûriyeyê. Zamir got ku Îsraîl guherînan dişopîne û rê nade ku hêzên dijber li ser sînorên wê xwe bi cih bikin û artêş amade ye ji bo rakirina gefan li her dem û cihî hêzê bi kar bîne.
Roja sêşemê balafirên şer ên Îsraîlê 8 mûşek avêtin Balafirgeha Leşkerî ya Ebû Zuhûrê li parêzgeha Îdlibê. Li gorî agahiyên îstixbaratî yên Îsraîlê, êrîş di demekê de pêk hat ku şandeyeke leşkerî ya Tirkiyeyê ji bo nûjenkirina balafirgehê çûbû wî cihî. Wezareta Karên Derve ya Sûriyeyê êrîş wekî destdirêjiyeke bêhincet bi nav kir û ji Konseya Ewlekariya Neteweyên Yekbûyî xwest helwestekê nîşan bide.
Washington jî ji êrîşa Îsraîlê dilgiran e. Nûnerê Taybet ê Amerîkayê Tom Barrack got ku êrîş zêdekirineke nehewce ya aloziyan e û diyar kir ku hikûmeta Ehmed Şer li Sûriyeyê helwesteke dijber nîşan nedaye û baştir e alî li şûna pevçûnê serî li dîplomasiyê bidin.
Piştî rûxîna desthilata Beşar Esed di dawiya sala 2024an de, Îsraîl hêzên xwe ji herêma Golanê ber bi kûrahiya axa Sûriyeyê ve birin. Berpirsên Tel Evîvê dibêjin ku armanca wan avakirina “herêmeke ewlehiyê ya bêçek” e û heta ku ev armanc pêk neyê, ji herêmên ku kontrol kirine venakêşin.
Yair Golan: Armanceke siyasî li pişt êrîşê heye
Rêberê Partiya Demokrat a Îsraîlê Yair Golan jî rexneyên tund li êrîşên asmanî yên welatê xwe li Sûriyeyê girtin. Wî êrîşan wekî gaveke tehrîkkirinê û metirsîdar bi nav kir ku dikare Îsraîl ber bi rûbirûbûna bi Tirkiyeyê ve bibe.
Golan diyar kir ku tevgerên leşkerî yên bi vî rengî nakokiyên di navbera Îsraîl û hevpeymanên wê, bi taybetî Amerîka, kûrtir dikin. Wî her wiha got ku careke din hêza leşkerî ji bo hesabên siyasî tê bikaranîn û Îsraîl dîsa bihaya ewlehiyê dide.
