قەندیل پرێس
لەیلا زانا، سیاسەتمەداری دیاری باکووری کوردستان لە پەیامێکدا بۆچوونى خۆى لەسەر ئەو دۆخە سیاسییەى تورکیا دەربڕى کە بە “قۆناغى نوێى سیاسى” ناودەبرێت و دەڵێت رووناکییەک بۆ هەموومان هەڵهاتووە و هەموومان لەبەردەم بەرپرسیارییەتیداین”.
لەیلا زانا، لە هەژماری خۆی لە پلاتفۆرمی کۆمەڵایەتیی ئێکس لە پەیامێکدا گوتى “رووناکیی ئومێد بۆ هەموو ئەوانە هەڵهاتووە کە لە دەست شەڕ و جەنگ دەناڵێنن. سڵاوێک بۆ ئەوانە هاتووە لە چاوەڕوانیی ئاشتییدا بوون، چاومان روون.”
لەیلا زانا، نووسیویەتی “ئێمەی تینووانی ئاشتیی، لە پشت و لەگەڵ ئەوانەدا دەبین بەبێ مەرج و بێنە و بەردە، کار بۆ ئەوە دەکەن پێشهات و دۆخی ئێستا لە چوارچێوەی سیاسیی و یاساییدا، بۆ چارەسەرێکی دیموکراتییانە بگۆڕن.”
لەیلا زانا ئاماژەی بەوەشکردووە، با ئەوانەی تۆوی ئاشتیی لە جوگرافیای رۆژهەڵاتی ناوەڕاستدا دەچێنن بزانن کە “لە ئاودانی ئەم تۆوانە بەردەوامدەبین”.
لەیلا زانا دۆخی ئێستا بە مێژوویی ناودەبات و دەڵێت “پرسەکە مێژوویی، ریشەیی و قورسە، هەموومان بۆ کۆتاییهێنان بەم شەڕە کە لانیکەم 100 ساڵە بەردەوامە، بەرپرسیارییەتی قوڵ، جددیی و مێژووییمان لەسەرشانە.”
لە کۆتایی پەیامەکەشیدا نووسیوویەتى “ئەو تۆوانەی ئاشتی دەیان ساڵ پێش ئێستا چێندران، بەرەکەتدار بێت، بەهیوای بەیانییەکی ئازاد”.
