قەندیل پرێس
قەندیل پرێس
لە پەیامێکی هۆشداری ئامێزدا بەبۆنەی جەژنی قوربانەوە مەسعود بارزانی سەرۆکی پارتی دیموکراتی کوردستان ڕوو لە سەرجەم لایەنە سیاسییەکانی هەرێمی کوردستان دەکات و داوای ڕاگرتنی دەستبەجێی ململانێ نێوخۆییەکان دەکات.
بارزانی ڕایگەیاند کە پێویستە لایەنەکان واز لەو خۆخۆری و ململانێ بێ ئەنجامە بهێنن کە ماوەیەکە پرۆسەی سیاسیی هەرێمی کوردستانی پەکخستووە.
سەرۆکی پارتی دیموکراتی کوردستان ئەم قۆناغەی ئێستای هەرێمی کوردستانی بە قۆناغێکی هەستیار و چارەنووسساز ناوزەد کرد. ئەو جەختی لەوە کردەوە کە بارودۆخی ناوچەکە و ئەو تەحەددییانەی لەسەر ئاستی ناوخۆ و دەرەوە ڕووبەڕووی قەوارەی هەرێم دەبنەوە چیتر بەرگەی پەرتەوازیی و درز و ململانێی لاوەکی ناگرن.
کۆبوونەوەی دوای جەژن دەروازەیەک بۆ دەربازبوون لە قەیران
لە پەیامەکەیدا مەسعود بارزانی داوایەکی ڕوون و کرداریی ئاراستەی هێزە سیاسییەکان دەکات بۆ ئەوەی دەستبەجێ دوای کۆتاییهاتنی جەژنی قوربان لەسەر مێزی گفتوگۆ کۆببنەوە. ئامانج لەم کۆبوونەوەیە چارەسەرکردنی چەقبەستووییە سیاسییەکەی ئێستا و کۆتاییهێنان بەو دۆخە نالەبارە سیاسییەی کە کاریگەریی نەرێنی کردووەتە سەر ژیانی هاووڵاتیان و کارکردنە بە گیانی بەرپرسیارێتی و نیشتمانپەروەریی ڕاستەقینە.
بارزانی لە بەشێکی پەیامەکەیدا دەڵێت پێویستە هەموو لایەک بیر لە بەرژەوەندییەکانی خەڵکی کوردستان بکەنەوە و بەرژەوەندییە باڵاکانی گەلەکەمان لە سەرووی ئامانج و بەرژەوەندیی بەرتەسک دابنێن.
داواکارییەک بۆ تێپەڕاندنی بەرژەوەندییە حزبییەکان
ئەم پەیامەی سەرۆکی پارتی دیموکراتی کوردستان لە کاتێکدایە کە شەقامی کوردی چاوەڕوانی هەنگاوی جدی و کرداریی دەکات لەلایەن سەرکردایەتی سیاسییەوە بۆ تێپەڕاندنی کێشەکان بەتایبەت لە بوارەکانی ئابووری و بەڕێوەبردن و پەیوەندییەکان لەگەڵ بەغدا. گوتاری بارزانی تیشک دەخاتە سەر ئەو ڕاستییەی کە بەرژەوەندییەکانی خەڵکی کوردستان دەبێت پێوەر و سەنگی مەحەک بن بۆ هەر ڕێککەوتن یان بڕیارێکی سیاسی لە داهاتوودا.
ئێستا چاوەکان لە دوای ڕۆژانی جەژن دەچنە سەر کاردانەوەی لایەنە سیاسییەکان کە ئایا هێزە سیاسییەکانی هەرێمی کوردستان دەتوانن ئەم دەرفەتە بقۆزنەوە و بە دەم بانگەوازەکەی مەسعود بارزانییەوە بچن بۆ گۆڕینی دۆخی نالەباری ئێستا بۆ سەقامگیریی سیاسی، ئەوە پرسیارێکە کە ڕۆژانی داهاتوو وەڵامەکەی دەسەلمێنن.
