قەندیل پرێس
هاوسەرۆکی کەجەکە ڕایگەیاند، بۆ ئەوەی پەکەکە کۆنگرە خۆی ببەستێت، دەبێت تورکیا مەرجەکانی ئاگربەست جێبەجێ بکات و دەشڵێت: پێویستە لە پەرلەمانی تورکیاوە هەندێک یاسا هەموار بکرێنەوە.
جەمیل بایک، هاوسەرۆکی کۆما جڤاکێن کوردستان- کەجەکە لە چاوپێکەوتنێکدا لەگەڵ میدیای نزیک لە پەکەکە وتی: بۆ ئەوەی پەکەکە بتوانێت کۆنگرە ببەستێت و چەکانێت و خۆی هەڵبوەشێنێتەوە، دەبێت مەرجەکانی ئاگربەست لەلایەن تورکیاوە جێبەجێ بکرێت.
هاوسەرۆکی کەجەکە جەختی لە ئامادەیی ئۆجالان بۆ بەڕێوەبردنی کۆنگرە کردەوە و دەڵێت: جگە لە ڕێبەرەکەیان کەسی تر ناتوانێت کۆنگرە بەڕێوە ببات و بڕیار بدات، بۆیە دەبێت ئۆجەلان خۆی ڕێنمایییەکان بخاتە بەردەم کۆنگرە.
بایک وتیشی: دەبێت لە پارلمانی تورکیا کۆمیسیۆن دابمەزرێنێت و هەندێک لە یاساکانی دەستور هەموار بکرێتەوە و سیستەمی ئیمرالی کۆتایی پێبهێنرێت.
ڕاشیگەیاند، هەڵوێستی کۆمەڵگای نێودەوڵەتی دوای بانگەوازەکەی ئۆجەلان ئەرێنی بو، بەڵام دەبێت هەنگاوی کرداری بۆ سەرخستنی پڕۆسەی چارەسەری پرسی کورد ببینن و ئەرک و بەرپرسیارێتی خۆیان جێبەجێ بکەن.
