قەندیل پرێس
کۆڵبەرێکی تەمەن ٢١ ساڵی کورد بە ناوی ڕەسوول قەڵەندەری، باوکی دوو منداڵی کەم تەمەن و خەڵکی شارۆچکەی کۆتۆل، بە تەقەی ڕاستەوخۆی هێزە چەکدارەکانی ئێران کوژرا.
ناوبراو سەرەتا بریندار کراوە و پاشان بە لێدانی سێ فیشەک لە سەری، بە شێوەیەکی ناخهەژێن کوژراوە.
بەپێی ڕاپۆرتی هەنگاو، ڕۆژی چوارشەممە ٣١ی پووشپەڕ، لە بەرزاییە سنوورییەکانی گوندی «بەلەجووک»ی سەر بە ناوچەی کۆتۆل لە شاری خۆی، کۆڵبەرێک بە تەقەی ڕاستەوخۆی هێزەکانی هەنگی سنووریی ئێران کوژرا.
هێزەکانی ئێران سەرەتا بێ ئاگاداریی پێشوەختە تەقەیان لە دەستەیەک لە کۆڵبەران کردووە کە لە ئەنجامدا ڕەسوول قەڵەندەری بریندار بووە. هێزەکانی هەنگی سنووری دوای برینداربوونی ئەم کۆڵبەرە چوونەتە سەر سەری و لە کاتێکدا ناوبراو بریندار و بێبەرگری لەسەر زەوی کەوتبوو، بە دەستڕێژیی ٣ گوللە بۆ سەری، کوشتوویانە.
ڕەسوول قەڵەندەری تەمەن ٢١ ساڵ؛ خێزاندار و باوکی دوو منداڵی ٣ ساڵان و ٥ مانگان بوو.
