قەندیل پرێس
قەندیل پرێس
پارتی یەکسانی و دیموکراسیی گەلان (دەم پارتی) کۆتایی بە کارەکانی پێنجەمین کۆنگرەی گەورەی ئاسایی خۆی هێنا، کە تێیدا بڕیار لەسەر نوێکردنەوەی پێکهاتەی سەرکردایەتی و ئۆرگانە بەڕێوەبەرییەکانی پارتەکە درا.
کۆنگرەکە بەیانی ئەمڕۆ لە ناوەندی کەلتووریی «نازم حیکمەت» لە ناوچەی یەنیمەحەلێی ئەنقەرە بەڕێوەچوو، بە بەشداریی بەرفراوانی نوێنەران، لایەنگران و کەسایەتییە دیارەکانی باکووری کوردستان و تورکیا. لە ڕەوتی پرۆسەی هەڵبژاردنەکەدا کە نزیکەی ٦٠٠ نوێنەر لە ڕێگەی یەک لیستەوە دەنگیان تێدا دا، هەر یەک لە تولای حاتیمۆغولاری و تونجەر باقرخان جارێکی دیکە وەک هاوسەرۆکی گشتیی دەم پارتی هەڵبژێردرانەوە.
هاوکات لە ئەنجامی دەنگدانەکەدا، ٨٠ ئەندامی بنەڕەتی و ٣٥ ئەندامی یەدەگ بۆ ئۆرگانە باڵاکانی پارتەکە دەستنیشان کران. هەروەها دەستەی نوێی بەڕێوەبەریی ناوەندی (مەیاکە) لە ٢٨ ئەندامی بنەڕەتی پێکدەهێنرێت و چەندین کەسایەتی و دەموچاوی نوێش لە ناو دەستەکەدا جێگەی خۆیان گرتووە.
هاوسەرۆکانی هەڵبژێردراو ڕایانگەیاند کەوا بە هەڵبژاردنی ئەم دەستە نوێیە و کۆتاییهاتنی کارەکانی پێنجەمین کۆنگرە، دەم پارتی بە سەرکردایەتییەکی بەهێزتر و ئیرادەیەکی نوێکراوەوە دەچێتە قۆناغێکی نوێی خەباتی سیاسی و ڕێکخستنی لە باکووری کوردستان و تورکیا.
