قەندیل پرێس
ئەمڕۆ شەممە، ٢٤ی کانوونی دووەمی ٢٠٢٦، لە شاری برۆکسل، بە دەستپێشخەریی کۆنگرەی نەتەوەیی کوردستان (KNK)، کۆبوونەوەیەک بە مەبەستی تاوتوێکردنی دۆخی ئێستای ئێران و ڕۆژهەڵاتی کوردستان، بۆ لایەنە سیاسییەکانی ڕۆژهەڵات بەڕێوەچوو.
نوێنەرانی حزبەکانی ناوەندی دیالۆگی حزبەکانی ڕۆژهەڵاتی کوردستان کە پێکهاتبوون لە پەژاک، سازمانی خەبات، کۆمەڵەی شۆڕشگێڕ، کۆمەڵەی زەحمەتکێشان، کۆمەڵە-ڕێکخراوی کوردستانی حیزبی کۆمۆنیستی ئێران و حیزبی دیموکراتی کوردستانی ئێران لەگەڵ کەسایەتییە ئەکادیمییەکان، جەختیان لە پێویستیی یەکگرتوویی لەم قۆناغە هەستیارەی ئێران و ناوچەکەدا کردەوە.
لە کۆبوونەوەکەدا ئەنجامنامەیەک بۆ ڕووبەڕووبوونەوەی ئاڵنگارییەکان و پاراستنی دەستکەوتەکانی نەتەوەی کورد پەسەند کرا.
گرنگترین خاڵەکانی ئەمجامنامەکە بریتین لە:
– دامەزراندنی پلاتفۆرمێکی سیاسی هاوبەش بۆ بڕیاردانی یەکگرتوو.
– دەستپێکردنی دەستپێشخەرییەکی دیپلۆماسی جیهانی بۆ پرسی کورد.
– ئامادەکاری بۆ بەستنی کۆنفرانسێکی گشتگیر بۆ هەموو ڕۆژهەڵاتی کوردستان.
– بەهێزکردنی میدیای سەربەخۆ و هەماهەنگی بەردەوام لەگەڵ کۆمەڵگەی مەدەنی.
لە کۆتایی کۆبوونەوەکەدا، بەشداربووان هۆشدارییان لە مەترسییەکانی سەر ڕۆژئاوای کوردستان دا و ڕایانگەیاند کە تەنها یەکڕیزیی هێزە کوردییەکان لەسەر بنەمای مافی چارەی خۆنووسین و دادپەروەری، دەتوانێت کەرامەتی نەتەوەیی و داهاتووی کورد بپارێزێت.
