قەندیل پرێس
قەندیل پرێس
فەرماندەیی ناوەندیی هێزەکانی ئەمریکا سێنتکۆم ڕایگەیاند بەرپەرچی زنجیرەیەک هێرشی بێ پاساوی هێزەکانی ئێرانیان لە تەنگەی هورمز داوەتەوە و وەک وەڵامدانەوەیەکیش چەندین پێگەی سەربازییان لە ناوخۆی ئەو وڵاتەدا کردووەتە ئامانج.
بەپێی ڕاگەیێندراوێکی فەرمی سێنتکۆم ڕۆژی 7ی ئایار سێ کەشتیی تێکشکێنەری مووشەکهاوێژی هێزی دەریایی ئەمریکا یو ئێس ئێس ترەکستن و یو ئێس ئێس ڕافایێل پێراڵتا و یو ئێس ئێس مەیسن لە کاتی تێپەڕبوونیان لە ڕێڕەوی ئاویی نێودەوڵەتی لە تەنگەی هورمز بەرەو دەریای عومان لەلایەن هێزەکانی ئێرانەوە هێرشیان کراوەتە سەر و سێنتکۆم جەختی کردووەتەوە کە هیچ کام لە کەشتییەکان زیانیان بەرنەکەوتووە.
هاوکات دۆناڵد ترەمپ سەرۆکی ئەمریکا لە هەژماری خۆی لە تۆڕی کۆمەڵایەتیی ترووس سۆشیاڵ پەیامێکی بڵاوکردەوە و ڕایگەیاند هێزەکانیان هێرشکارەکانیان بە تەواوی تێکشکاندووە و ژمارەیەکی زۆر لەو بەلەمە بچووکانەی کە ئێران وەک جێگرەوەی هێزە دەریاییە سەر بڕاوەکەی بەکاریان دەهێنێت نوقمی دەریا کراون.
ترەمپ لەبارەی وردەکاریی پێکدادانەکە نووسیویەتی مووشەک ئاراستەی کەشتییە تێکشکێنەرەکانمان کرا و ئەوان بە ئاسانی تێکشکێندران بە هەمان شێوە درۆنەکان هاتن و لە ئاسماندا سووتێنران و زۆر بە جوانی کەوتنە ناو زەریاوە ڕێک وەک ئەوەی پەپوولەیەک بەرەو گۆڕ بڕوات.
سەرۆکی ئەمریکا ڕەخنەی تووندی لە سەرکردایەتیی ئێران گرت و گوتی وڵاتێکی ئاسایی ڕێگەی بەم کەشتییانە دەدا دەرباز بن بەڵام ئێران وڵاتێکی ئاسایی نییە و لە لایەن کۆمەڵێک شێتەوە سەرکردایەتی دەکرێن کە ئەگەر دەرفەتیان هەبێت چەکی ئەتۆمی بەکاردەهێنن بەڵام هەرگیز ئەو دەرفەتەیان بۆ ناڕەخسێت.
ترەمپ هەڕەشەی لە تاران کرد و گوتی وەک چۆن ئەمڕۆ تێکمان شکاندن لە داهاتوودا زۆر بەهێزتر و بە تووندتر لێیان دەدەین ئەگەر بە خێرایی ڕێککەوتن واژۆ نەکەن هەروەها ڕایگەیاند کە ئەو سێ کەشتییە ئێستا دەگەڕێنەوە بۆ ناو گەمارۆ دەریاییەکەی ئەمریکا کە بە دیواری پۆڵایین وەسفی کرد.
ئەم گرژییە سەربازییە لە کاتێکدایە کە ئاگربەستی کاتیی نێوان تاران و واشنتن بەرەو هەرەسهێنان دەچێت و پەرەسەندنەکان مەترسیی هەڵگیرسانی جەنگێکی سەرتاسەری و دروستبوونی تەنگژەیەکی گەورەی لە بازاڕی وزەی جیهانیدا هێناوەتە ئاراوە.
