قەندیل پرێس
وەزارەتی بەرگریی تورکیا رایگەیاند، ئۆپراسیۆنەکانیان بۆ کۆتاییهێنان بە چالاکییەکانی پەکەکە لە هەرێمی کوردستان بەردەوامن.
زەکی ئاکتورک، راوێژکاری پەیوەندییەکان و راگەیاندن لە وەزارەتی بەرگریی تورکیا لە کۆنفرانسی هەفتانەی وەزارەتەکەیدا رایگەیاند، گەڕان و پشکنین و ئۆپراسیۆنەکانیان بۆ سفرکردنەوەی چالاکی و جموجوڵەکانی پەکەکە لە هەرێمی کوردستاندا بەردەوامن.
هاوکات سەرچاوەیەک لە وەزارەتی بەرگریی تورکیا، لەبارەی کۆبوونەوەی نێوان شاندی وەزارەتی بەرگریی وڵاتەکەی و وەزیری بەرگریی سووریا کە 19ـی ئەم مانگە لە دیمەشق بەڕێوەچوو رایگەیاند، لە کۆبوونەوەکەدا باس لە بەهێزکردنی هەماهەنگییە سەربازییەکان، بەرەنگاربوونەوەی “تیرۆر” و بەهێزکردنی توانای سەربازیی سووریا کراوە.
سەرچاوەکە لەبارەی گفتوگۆکانیان لەگەڵ ئیسرائیل لەپێناو رێگرتن لە پێکدادانی سەربازیی لە سووریا رایگەیاند، “بۆ رێگرتن لە رووداوی نەخوازراو لە سووریا و پێکهێنانی میکانیزمێک بۆ پێکدانەدان، بە شێوەیەکی بەردەوام لەگەڵ لایەنی بەرامبەر لە گفتوگۆی تەکنیکیداین. “
