قەندیل پرێس
سەرۆکایەتیی کۆماری سووریا ئاشکرایدەکات، لێدوانی بەشێک لە سەرکردەکانی هەسەدە و داواکردنی فیدراڵی، پێچەوانەی رێککەوتنەکەی نێوان ئەحمەد شەرع و مەزڵوم عەبدییە و هەڕەشەیە بۆسەر یەکپارچەیی خاکی سووریا.
دەشڵێت، نابێت هەسەدە بڕیارى باکوور و رۆژهەڵاتی سووریا بۆخۆی قۆرخ بکات و یەکپارچەیی گەل و خاکی وڵاتەکەش بە هێڵی سوور ناودەبات.
سەرۆکایەتیی سووریا لە راگەیەندراوێکدا دەڵێـت، رێککەوتنەکەی ئەحمەد شەرع و مەزڵوم عەبدی، هەنگاوێکی بنیادنەرانەیە، ئەگەر بە رۆحێکی نیشتمانییانەوە جێبەجێبکرێت، دوور لە پرۆژەی جیاکاری و پەرواێزخستن.
هەر لە راگەیەندراوەکەدا، سەرۆکایەتیی سووریا، هەموو هەوڵێک بۆ سەپاندنی دابەشکاریی و دروستکردنی قەوارەی سەربەخۆ لەژێر ناونیشانی فیدراڵی یان بەڕێوەبەرایەتیی خۆسەر بەبێ رێککەوتنی نیشتمانیی گشتگیر رەتدەکاتەوە.
سەرۆکایەتیی سووریا یەکپارچەیی سووریا و گەلەکەشی بە هێڵی سوور ناودەبات.
سەرۆکایەتیی سووریا هۆشداریی دەداتە هەسەدە لە پەکخستنی کارى دامەزراوەکانی دەوڵەت لەناوچەکانی ژێر دەسەڵاتی خۆیی بە بێبەشکردنی هاوڵاتییان لە خزمەتگوزارییەکان و قۆرخکردنی سەرچاوە نیشتمانییەکان و بەکارهێنانیان بۆ ئامانجی دابەشکاریی و هەڕەشەکردن لە سەروەریی وڵات وەک لە راگەیەندراوەکەدا هاتووە.
سەرۆکایەتیی سووریا دەشڵێت، نابێت هەسەدە بڕیارى باکوور و رۆژهەڵاتی سووریا بۆخۆی قۆرخبکات، کە پێکهاتەکانی عەرەب و کورد و کریستان تیایدا دەژین.
سەرۆکایەتیی سووریا جەختلەوەدەکاتەوە، مافی کورد وەک مافی تەواوی پێکهاتەکانی دیکەی گەلی سووریا پارێزراوە لە چوارچێوەی دەوڵەتی سووریای یەکگرتوودا و داوا لە هەسەدە دەکات، پابەندی رێککەوتنی نێوانیان بێت و بەرژوەندیی نیشتمانیی باڵا بخاتە پێش هەر بەرژەوەندییەکی دیکەوە.
