قەندیل پرێس
عومەر چەلیک، گوتەبێژی پارتى داد وگەشەپێدان “ئاکپارتی” رایگەیاند، تەنیا قسە بەس نییە و پێویستە پەکەکە بە کردار چەکدابنێت، ئاماژەی بەوەشکرد چەکدانان پژاکیش دەگرێتەوە و دەبێت هەسەدەش چەکەکانی بداتە حکومەتی سووریا.
لە بەرنامەیەکی خەبەرتورک، عومەر چەلیک وەڵامی پرسیارەکانی لەبارەی ئەو پرۆسەیە دایەوە کە تاوەکو ئێستا ناوێکی هاوبەشی بۆ دانەنراوە و ئەنقەرە بە تورکیای بێ تیرۆر ناویدەبات.
چەلیک ئاماژەی بەوەکرد، مەبەست لە چەکدانان بریتییە لە رادەستکردنی چەکەکان، واتە دەبێت پەکەکە خۆی هەڵبوەشێنێتەوە و چەکەکانی رادەست بکات.
گوتیشی “چەکدانان سەرجەم لق و درێژکراوەکانی پەکەکە لە ناوخۆی تورکیا و دەرەوە دەگرێتەوە بە ئەوروپاشەوە. واتە سەرجەم لقەکانی پەکەکە لە ئەوروپا، عێراق، سووریا و لە ئێرانیش پژاک دەگرێتەوە”.
ئاماژەی بەوەکرد، جیاوازی لەنێوان وڵاتەکاندا لەڕووی چەکدانان هەیە و گوتی “دۆخی عێراق لەوەی سووریا جیاوازە. لە سووریا پێویستە هەسەدە چەکەکان رادەستی حکومەت بکەن و ببنە بەشێک لە سوپا. پاش ئەوە دەتوانن پارتی سیاسیی دابمەزرێنن و لە چالاکییەکانیان بەردەوام بن، تاوەکو ئەو کاتەی دوژمنایەتی تورکیا نەکەن. پێویستە جیاوازیی مۆدێلەکەی ئەوێ لەبەرچاو بگیرێت”.
گوتەبێژی ئاکپارتی باس لەوەدەکات، چەکدانان بە قسە نابێت و دەبێت لەڕووی مەیدانییەوە ئەمە ببینرێت. لەوبارەیەوە گوتی “میت و سوپای تورکیا میکانیزمی پێویست دادەنێن و بەشێوەیەکی کاریگەر کاردەکەن”.
گوتیشی”میکانیزمی پشتڕاستکردنەوە دادەمەزرێنرێت و دەبێت پرۆسەی چەکدانان چەندین مانگی پێنەچێت ئەگەرنا بەڕووی کاری تێکدەریدا کراوە دەبێت”. بەپێویستیشیزانی بە باشی پرۆسەکە بەڕێوەببەن و رێگە بە کاری تێکدەرانە نەدەن.
