پارەی هاوپەیمانان دەگاتە هەرێمی کوردستان

قەندیل پرێس- هەولێر

ئەمرۆ 3ـی خەرمانانی 2025 وەزارەتی پێشمەرگەی هەرێم رایدەگەیەنێت: رۆژی یەکشەممە هاوکاریی هاوپەیمانان بۆ مانگی شەش دابەشدەکرێت.

لە راگەیەندراوی وەزارەتی پێشمەرگەی هەرێمدا هاتووە، ئەمڕۆ پێنجشەممە 3ـی خەرمانانی 2025 هاوکاریی دارایی هاوپەیمانان بۆ مانگى شەش تەمویلی وەزارەتی پێشمەرگە دەکرێت و دوای ئەنجامدانی رێکارە دارایى و ژمێریارییەکان لەلایەن بەریوەبەرایەتیى گشتى بودجە و بەرنامەکان (ژمێریارى سەربازى) رۆژی یەکشەممە دەست بە دابەشکردنى دەکرێت.

ئاشکراشیکردووە، ئەم مانگە 64 هەزار و 244  ئەفسەر و پلەدار و پێشمەرگە بە سیستەمی پڕۆژەی هەژماری من، هاوکاری هاوپەیمانان وەردەگرن.

بەپێ زانیاریەکانی قەندیل پرێس هاوپەیمانانی دژی داعش بە سەرۆکایەتی ئەمریکا ماوەی یانزە ساڵە پرۆژەی یەکخستنی هێزەکانی پێشمەرگە هەیە و مانگانە 250 ملیۆن دۆلار تەمویلی هێزەکانی پێشمەرگە دەکات، و تا ئیستا یەکێتی و پارتی سەرباری لێدوانەکانیان بۆ پابەندبوون بە یەکگرتن و یەکخستنی هێزەکانیان، بەڵام لەبواری پراکتیکدا ئاستەنگ بۆ ئەو پرۆسەیە دروست دەکەن و هێزەکانی 70ـی یەکێتی و 80ـی پارتی لە چارچێوەی وەزارەتی پێشمەرگەی حکومەتی هەرێمی کوردستاندا کار ناکەن.