قەندیل پرێس
پاش کۆتاییهاتنی شەڕ، ڕێژیمی کۆماری ئیسلامی لە شارەکانی ڕۆژهەڵاتی کوردستان ژمارەیەکی زۆر خاڵی پشکنینی جێگیر کردووە و دۆخەکەی بەتەواوەتی مێلیتاریزە کردووە.
بەپێی هەواڵ و گرتە ڤیدیۆ بڵاوکراوەکان، هەموو ڕێگەکانی چوونە ژوورەوە و چوونە دەرەوەی شارەکانی ڕۆژهەڵاتی کوردستان لەلایەن هێزەکانی سپای پاسداران و پۆلیسەوە بە دانانی خاڵی پشکنین گیراوە و کەشێکی تەواو ئەمنییەتی بە سەر شارەکاندا سەپێندراوە.
لە یەکەم ڕۆژەکانی دەسپێکی شەڕەوە ڕێژیمی کۆماری ئیسلامی لە زۆربەی شارەکانی ڕۆژهەڵاتی کوردستان و ئێران بە دانانی خاڵی پشکنین، بۆ چەکوچۆڵ بەتایبەتی فڕۆکە بێفڕۆکەوانەکان دەگەڕا.
سەرەتا تەنیا ماشینە بارهەڵگرەکان و وانێتەکان پشکنینیان بۆ دەکرا بەڵام لە ئێستادا پشکنینەکان چڕتر بووەتەوە و زۆربەی ماشینەکان لەم خاڵانەدا ڕادەگیرێن و پشکنینیان بۆ دەکرێت.
لە ڕۆژانی ڕابردوودا ئەم خاڵانە بە تەواوەتی لە شارەکانی ڕۆژهەڵاتی کوردستاندا جێگیر کراون و هەموو هاتوچووەکان لەلایەن هێزەکانی ڕێژیمەوە کۆنتڕۆڵ دەکرێن کە ئەمە بووەتە هۆی دروستکردنی کێشە و بەفیڕۆدانی کاتی خەڵک لەم خاڵانەدا.
