قەندیل پرێس
شاندى ئیمراڵى راگەیەندراوێکى لەبارەى کۆبوونەوەى لەگەڵ رەجەب تەیب ئەردۆغان، سەرۆککۆماری تورکیا لە کۆشکی کۆماریی بڵاوکردەوە و کۆبوونەوەکەی بە زۆر ئەرێنی و بەرهەمدار ناوبرد.
شاندی ئیمراڵی کە لە سڕی سورەیا ئۆندەر و پەروین بوڵدان پێکهاتبوو لە راگەیەندراوەکەدا دەڵێت “کۆبوونەوەکە زۆر ئەرێنی، بەرهەمدار و بنیادنەرانە بووە و لە ژینگەیەکدا بەڕێوەچوو کە سەبارەت بە داهاتوو ئومێدبەخش بوو.”
شاندی ئیمراڵی ئاماژەی بەوەشکردووە، لە کۆبوونەوەکەدا جەخت لە گرنگیی ئەو قۆناغە کرایەوە کە پێیگەیشتوون و هەردوولا هەڵسەنگاندنیان بۆ قۆناغەکانی داهاتوو کرد. هاوکات باس لەوەکرا، قۆناغی دوور لە شەڕ کە تێیدا گۆڕەپانی سیاسی و دیموکراسیی بەهێز بێت بۆ تورکیا و هاوڵاتییان و ناوچەکەش گرنگە.
لە درێژەی راگەیەندراوەکەدا باس لەوەکراوە، شاند و پارتەکەیان، لە قۆناغی داهاتوودا بە ئیرادەیەکی تایبەت و بەهێزترەوە لە کار و هەوڵەکانی بۆ جێبەجێکردنی بانگەوازی “ئاشتی و کۆمەڵگەی دیموکراسی” ئۆجەلان بەردەوامدەبێت.
لە کۆتایی راگەیەندراوەکەدا شاندى ئیمراڵى دەڵێت “دەیانەوێت بە شانازییەوە بە وڵاتەکەیان رابگەیەنن کە لە ئەمڕۆوە و بەو خاڵەی پێیگەیشتوون، لە دوێنێ ئومێدەوارترن.”
