قەندیل پرێس
قەندیل پرێس ــ دیمەشق
دیمەشق هۆشداری دەداتە حیزبوڵڵا و ڕایدەگەیەنێت کە سنوورەکان هێڵی سوورن.
سەرچاوەیەکی بەرپرس لە وەزارەتی بەرگریی سووریا سەر بە حکومەتی کاتی ڕایگەیاند کە هێزەکانیان فەرمانی توندیان پێدراوە بۆ لێدانی هەر هەوڵێکی چەکدارانی حیزبوڵڵای لوبنانی کە بیەوێت خاکی سووریا ببەزێنێت. ئەم هەڵوێستە نیشانەی گۆڕانی تەواوەتی هاوکێشە سیاسییەکانە لە ناوچەکەدا.
سەرچاوە سەربازییەکە جەختی کردووەتەوە کە پاراستنی سەروەریی خاکی سووریا لە پێشینەی کارەکانیانە. هاوکات حکومەتی کاتی پێشوازی لە بڕیاری حکومەتی لوبنان کردووە بۆ نەهێشتنی شەرعیەتی حیزبوڵڵا و ئەم هەنگاوەی بە نیشانەیەکی پۆزەتیڤ وەسف کردووە بۆ سەقامگیری ناوچەکە. ڕۆژنامەی شەرق ئەلئەوسەت لە زاری سەرچاوەکانی نزیک لە حکومەتی کاتییەوە بڵاویکردەوە، کە سووریا ناتوانێت خۆی بەدوور بگرێت لەو ئاڵۆزییە ناوخۆییانەی چاوەڕوان دەکرێت لە لوبنان ڕوو بدەن، بۆیە هەوڵەکان بۆ ئەوەن کە ڕێگری لە هەر هەڕەشەیەک بکەرێت کە سەقامگیری و دەسەڵاتی حکومەتی نوێی سووریا بخاتە مەترسییەوە.
کێشەی نێوان حکومەتی نوێی سووریا و حیزبوڵڵا لە چەند خاڵێکی سەرەکیدا کۆدەبێتەوە، لەوانە گۆڕانی دەسەڵات لە سووریا و هەوڵی حکومەتی کاتی بۆ کۆتاییهێنان بە هەموو جۆرە هەژموونێکی میلیشیا بیانییەکان کە لە ساڵانی ڕابردوودا لە ناو خاکی سووریادا بوون. هەروەها پاراستنی سنوورەکان وەک پرسێکی ستراتیژی دەبینرێت چونکە حکومەتی نوێ دەیەوێت ئەو ڕێگەیانە بە تەواوی دابخات کە پێشتر بۆ گواستنەوەی چەک بەکارهاتوون بۆ ئەوەی وڵاتەکە نەبێتە گۆڕەپانی ململانێی دەرەکی. لە لایەکی ترەوە فشارە نێودەوڵەتی و هەرێمییەکان پاڵنەرن بۆ ئەوەی حکومەتی کاتی شەرعیەتی نێودەوڵەتی بەدەستبهێنێت و خۆی لە گروپە چەکدارەکان جیا بکاتەوە. لە کۆتاییدا کاریگەریی دۆخی ناوخۆی لوبنان و لاوازبوونی پێگەی حیزبوڵڵا وای کردووە ئەگەری پاشەکشەی چەکدارەکانیان بۆ ناو سووریا زیاد بێت، ئەمەش لای حکومەتی دیمەشق وەک هەڕەشەیەک بۆ سەر ئاسایشی نیشتمانی ئەژمار دەکرێت.
