قەندیل پرێس
سەرۆک کۆماری تورکیا ڕایگەیاند، تورکیا تەحەمولی ئەوە ناکات یەپەگە سێیەکی خاکی سوریای لەژێر دەستدا بێت و دەشڵێت: بەم زووانە هەنگاو دەنێت بۆ چارەسەرکردنی ڕیشەیی ئەو “کێشەیە”.
رەجەب تەیب ئەردۆغان، سەرۆك كۆماری توركیا، لە كۆنگرەی هەشتەمی پارتی دادو گەشەپێدان لەپارێزگای مێرسن، ئاماژەی بە دۆخی سوریا کرد و وتی: وڵاتەکەی پشتیوانی لە هەموو ئەو هەوڵانە دەکات کە ئامانجیان دەستەبەرکردنی یەکڕیزی سیاسی و یەکپارچەیی خاکی و ئاشتی کۆمەڵایەتی و ئاوەدانکردنەوەی سوریایە.
ئەردۆغان ڕاشیگەیاند، تورکیا سوورە لەسەر ڕێگرتن لە جێبەجێکردنی سیناریۆی نوێ لە سوریا، چ بە داماڵینی چەک یان لەناوبردنی “ڕێکخراوە تیرۆریستییەکان کە خاکی سوریایان داگیرکردووە”.
سەرۆك كۆماری توركیا نیگەرانی خۆی دەربڕی بەرامبەر دەسەڵاتی کورد لە ڕۆژئاوای کوردستان و سوریا و وتی: تورکیا هیچ لێبوردەییەکی بەرامبەر بە یەپەگە ناکات، کە سێیەکی سوریای داگیر کردووە و بەم زووانە “هەنگاو دەنێت بۆ چارەسەرکردنی کێشەکە”.
