قەندیل پرێس
کاتژمێر نزیک یەکی نیوەشەوی شەممە ٢٩ی خەرمانان، چیا ئەحمەد نژاد، کاسبکاری ٤٢ ساڵە و نیشتەجێی پیرانشار، خێزاندار و باوکی سێ منداڵ، لە ڕێگای گوندی زێوە سەر بەم شارە، لە لایەن هێزە چەکدارەکانی ئێرانەوە کەوتە بەر تەقەی ڕاستەوخۆ و تەرمەكەی پاش کوژرانی هەر لەوێدا بە جێ هێڵدرابوو.
بە وتەی سەرچاوە ئاگادارەكان، ئۆتۆمبێلی ئەم هاووڵاتییە لە کاتێکدا کە هیچ جۆرە کەرەستە و بارێکی لەگەڵ نەبووە، بە بیانووی هەڵگرتنی باری قاچاخ و بە بێ ئاگاداری پێشوەختە بەر دەستڕێژی فیشەک دراوە.
هێزەکانی کۆماری ئیسلامیی ئێران پاش کەوتنە دوای چیا ئەحمەدنژاد تا ڕێگای گوندی زێوە، ئەم هاووڵاتییەیان بە سێ فیشەک کوشتووە و تەرمەكەیان هەر لەوێدا بە جێ هێشتووە.
تەرمی چیا ئەحمەدنژاد پاش چەند کاتژمێر دۆزرابووەوە و ئێوارەی هەمان ڕۆژ بە خاک ئەسپێردرا.
