قەندیل پرێس
قەندیل پرێس
دەقی پەیامی دۆناڵد ترەمپ سەرۆکی ئەمریکا لەبارەی گەرووی هورمز:
وڵاتانی هەموو جیهان، کە نزیکەی هەموویان بەشدار نین لەو کێشە و ململانێیەی ڕۆژهەڵاتی ناوەڕاست کە ئەوەندە بە ئاشکرا و توندوتیژییەوە لەبەر چاوی هەمووان ڕوودەدات، داوایان لە ویلایەتە یەکگرتووەکان کردووە کە ئایا دەتوانین یارمەتییان بدەین لە ڕزگارکردنی کەشتییەکانیان، کە لە گەرووی هورمز گیریان خواردووە، لەسەر شتێک کە هیچ پەیوەندییەکی بەوانەوە نییە – ئەوان تەنها بێلایەن و ڕێبوارێکی بێتاوانن!
لەپێناو بەرژەوەندی ئێران، ڕۆژهەڵاتی ناوەڕاست و ویلایەتە یەکگرتووەکان، بەم وڵاتانەمان گوتووە کە ئێمە ڕێنوێنی کەشتییەکانیان دەکەین بە سەلامەتی لەو ڕێڕەوە ئاوییە سنووردارانە بچنە دەرەوە، بۆ ئەوەی بتوانن بە ئازادی و بە لێهاتووییەوە بەردەوام بن لە کارەکانیان.
دووبارەی دەکەمەوە، ئەمانە کەشتیی ئەو ناوچانەی جیهانن کە بە هیچ شێوەیەک بەشدار نین لەوەی ئێستا لە ڕۆژهەڵاتی ناوەڕاست ڕوودەدات.
نوێنەرەکانم ڕاسپاردووە کە پێیان ڕابگەیەنن ئێمە هەموو هەوڵێکی خۆمان دەدەین بۆ ئەوەی کەشتییەکان و تاقمەکانیان بە سەلامەتی لە گەرووی هورمز ببەینە دەرەوە.
لە هەموو حاڵەتەکاندا، گوتوویانە کە ناگەڕێنەوە تا ئەو کاتەی ناوچەکە بۆ هاتوچۆ و هەموو شتێکی تر سەلامەت دەبێت.
ئەم پڕۆسەیە، “پڕۆژەی ئازادی” (Project Freedom)، بەیانی ڕۆژی دووشەممە بە کاتی ڕۆژهەڵاتی ناوەڕاست دەست پێدەکات.
من بە تەواوی ئاگادارم کە نوێنەرەکانم گفتوگۆی زۆر ئەرێنییان لەگەڵ وڵاتی ئێران هەیە، و ئەم گفتوگۆیانە دەتوانن بەرەو شتێکی زۆر ئەرێنی بۆ هەمووان هەنگاو بنێن.
جوڵەی کەشتییەکان تەنها مەبەست لێی ئازادکردنی ئەو خەڵکە و کۆمپانیا و وڵاتانەیە کە بە ڕەهایی هیچ هەڵەیەکیان نەکردووە – ئەوان قوربانیی بارودۆخەکەن.
ئەمە دەستپێشخەرییەکی مرۆییە لەلایەن ویلایەتە یەکگرتووەکان، وڵاتانی ڕۆژهەڵاتی ناوەڕاست، بەتایبەتیش وڵاتی ئێران.
زۆرێک لەم کەشتییانە خواردن و هەموو پێداویستییەکی تریان بەرەو کەمبوونەوە دەچێت کە بۆ تاقمە گەورەکان پێویستە تاوەکو بە شێوەیەکی تەندروست و پاکوخاوێن لەناو کەشتییەکاندا بمێننەوە.
پێم وایە ئەمە هەنگاوێکی گەورە دەبێت بۆ نیشاندانی نیازپاکی لەلایەن هەموو ئەو کەسانەی کە لە چەند مانگی ڕابردوودا بەو سەختییە شەڕیان کردووە.
ئەگەر بە هەر جۆرێک بێت دەستوەردان لەم پڕۆسە مرۆییەدا بکرێت، ئەو دەستوەردانە بەداخەوە دەبێت بە هێز وەڵام بدرێتەوە. سوپاس بۆ سەرنجتان لەسەر ئەم بابەتە!
