قەندیل پرێس
لە ئەڵمانیا پەیامێکی مەسعود بارزانی ئاڕاستەی خەڵکی کوردستان کرا و تیایدا ناوبراو پاڵپشتی خۆی بۆ رۆژئاوا دووپاتکردەوە و ئاماژەی بەوەکرد کە خاکی کوردانی سوریا بە “ناحەق” دابەشکراوە.
ئەمڕۆ شەممە پاش ئەوەی لە شاری بۆن-ی ئەڵمانیا هاوڵاتییان بۆ پاڵپشتیی رۆژئاوای کوردستان گردبوونەوە، لە رێوڕەسمەکەدا وتارێکی مەسعود بارزانی، سەرۆکی پارتیی دیموکراتی کوردستان خوێندرایەوە و تیایدا هاتووە “گەلی کورد یەک نەتەوەیە و یەک چارەنووسیشمان هەیە. گەلی کوردستان هیچ کات ئیرادەی خۆی لەدەست نەداوە”.
وتیشی “خاکی کوردستان بە ناحەقی دابەشکراوە. دەبێت هەر کوردێک پشتیوانیی کوردی رۆژئاوای کوردستان بێت. دەبێت کۆمەڵگەی نێودەوڵەتی بەرپرسیارێتی خۆی جێبەجێ بکات، هەروەها دەبێت مرۆڤایەتی پارێزەری کوردستان بێت”.
بارزانی لەپەیامەکەدا باسی لەوەشکردووە، گەلی کورد یەک نەتەوەیە و یەک چارەنووسیشیان هەیە و کێشەی لەگەڵ هیچ نەتەوەیەک نییە.
سەرۆکی پارتی داواشی لە حکومەتی سوریا و هەسەدە کردووە، پابەندی ئاگربەست بن و پشت بە دیالۆگ ببەستن. هەروەها راشیگەیاندووە “پێویستە مافەکانی گەلی کورد لە دەستوری سوریادا جێگیر بکرێن”.
