قەندیل پرێس
نوێنەری ئەنجوومەنی سووریای دیموكرات “مەسەدە” لە ئەمریكا، دەڵێت كۆبوونەوەی مەزڵوم عەبدی فەرماندەی هێزەكانی سوریای دیموكرات و نوێنەری بارزانی، هەنگاوێكی گرنگە بۆ یەكێتیی كورد لە هەرێمی كوردستان و رۆژئاوای كوردستان.
سینەم محەممەد، نوێنەری “مەسەدە” لە ئەمریكا لە هەژماری خۆی لە تۆڕی كۆمەڵایەتی “X” رایگەیاندووە، “دیداری فەرماندە مەزڵوم عەبدی لەگەڵ د. حەمید دەربەندی، نوێنەری مەسعود بارزانی هەنگاوێكی گرنگە بۆ بەهێزكردنی یەكێتیی كورد و پەیوەندییە دوولایەنەكان.”
نوێنەرەكەی مەسەدە دەشڵێت “ئەم دیدارە هەنگاوێكی گرنگە بۆ پشتیوانی لە دیالۆگ لەگەڵ دیمەشق و بەدیهێنانی بەرژەوەندییەكانی گەلی سووریا.”
سینەم محەممەد راشیگەیاندووە “ئەم دیدارە پێداگریی بارزانی لەسەر بەهێزكردنی ئارامی و هاوكاری لە ناوچەكە و جێگیركردنی مافەكانی گەلەكەمان نیشان دەدات.”
