قەندیل پرێس
وەزارەتی تەندروستی حکومەتی هەرێمی کوردستان لە نوێترین ڕاگەیاندراویدا ئاماژە بەوە دەکات کە ڤایرۆسی هانتا نەخۆشییەکی ڤایرۆسی گواستراوەیە و لەڕێگەی قرتێنەرە تووشبووەکان یان دەرهاویشتەکانیانەوە دەگوازرێتەوە بۆ مرۆڤ و هەوکردنەکەش زیاتر بەهۆی هەڵمژینی تۆزی پیسبوو لە کاتی پاککردنەوەی شوێنە داخراوەکاندا ڕوودەدات.
وەزارەتەکە لە زانیارییەکانیدا ڕوونی کردووەتەوە کە بەپێی ڕاپۆرتەکانی ڕێکخراوی تەندروستی جیهانی ساڵانە لەنێوان ١٠ بۆ ١٠٠ هەزار حاڵەتی تووشبوون لە جیهاندا تۆمار دەکرێت و نیشانەکانیشی بریتین لە تا و ماندووبوون و سەرئێشە و ئازاری سک و لە حاڵەتە توندەکاندا دەبێتە هۆی تەنگەنەفەسی کە ڕێژەی مردن تێیدا دەگاتە ٢٠ بۆ ٥٠ لەسەد.
سەبارەت بە دۆخی هەرێمی کوردستان وەزارەتی تەندروستی دڵنیایی دەدات کە تا ئێستا هیچ گومانلێکراو یان حاڵەتێکی تووشبوون بەو ڤایرۆسە تۆمار نەکراوە و تیمی تایبەت بە هەماهەنگی لەگەڵ ڕێکخراوی تەندروستی جیهانی بە وردی چاودێری دۆخەکە دەکەن و هەموو ئامادەکارییەکی تاقیگەیی و چارەسەری و ڕێوشوێنی خۆپارێزییان لە سەرجەم پارێزگا و ئیدارە سەربەخۆکان گرتووەتە بەر.
لە کۆتایی ڕاگەیاندراوەکەدا جەخت کراوەتەوە کە لە ئێستادا هیچ جۆرە سنووردارکردنێکی گەشتکردن یان بازرگانی لە ئارادا نییە و تەنها ڕێکارە تەندروستییەکان جەخت لەسەر چاودێریکردنی ورد و هۆشیارکردنەوەی هاوڵاتیان دەکەنەوە بۆ پاکوخاوێنی ژینگە و دوورکەوتنەوە لە بەرکەوتن لەگەڵ قرتێنەرەکان.
