قەندیل پرێس
ناوەندی ڕاگەیاندنی هێزەكانی سوریای دیموكرات هەسەدە لە ڕاگەیاندراوێكدا شەهیدبوونی 12 شەڕڤانی ئاشكرا كرد كە لە شەڕی بەرامبەر گرووپە توندڕەوەكانی سەر بە دەوڵەتی توركیا شەهیدبوون.
لە ڕاگەیاندراوەكەدا هاتووە “لە هەرێمەكانی باكوور و ڕۆژهەڵاتی سوریا، شەڕڤانانی هەسەدە داستانی قارەمانێتی دەنووسنەوە، بەتایبەت لە بەندوای تشرین و پردی قەرەقۆزاق. ئەمە ٢٨ ڕۆژە شەڕڤانان تەواوی هێرشی چەتەكانیان شكاندووە و ئەفسانەی لوتبەرزیی دەوڵەتی توركیان تێكشكاند”.
دەشڵێت “شەڕڤانان بە یەكگرتنی بەهێزی كورد و عەرەب و سریانی و پێكهاتەكانی تر، بەرخۆدانێكی مەزن دەكەن و تا كۆتایی شكۆی دانیشتووان دەپارێزن. گیانی خۆیان كردووەتە پردێك تا گەلانی هەرێمەكە بگەنە ئازادی و ئاشتی و ئاسایش”.
لە ڕاگەیاندراوەكە هەسەدە دەڵێت “بەڵێن دەدەن بە تێكشكاندنی خەونی داگیركەرانو سەرەخۆشی لە بنەماڵەی شەهیدان دەكات و بەڵێن دەدات بە درێژەدان بە ڕێگەی فیداكاری و فراوانكردنی تێكۆشان بەرامبەر هێرشەكان. هەروەها بەڵێن دراوە كە هەرگیز ناهێڵن چەتەكان بگەنە هەرێمەكە و لەسەر بەڵێنەكانیان بۆ شەهیدان بەردەوام دەبن”.
