قەندیل پرێس
هاکان فیدان، وەزیری دەرەوەی تورکیا باوەڕی وایە دروستنییە رووداوەکانی سووریا بخرێتە ئەستۆی مەزهەبێک یاخود پێکهاتەیەکی ئایینی.
فیدان لە پاش کۆبوونەوە پێنج قۆڵییەکەی عەممان لەنێوان وڵاتەکەی، عێراق، لوبنان، سووریا و ئوردن، لە تۆڕی کۆمەڵایەتیی ئێکس پەیامێکی بڵاوکردەوە.
وەزیری دەرەوەی تورکیا لەبارەی شەڕ و پێکدادانەکانی چەند رۆژی رابردووی لە پارێزگاکانی رۆژئاوای سووریا دەڵێت: “تێبینیی ئەوە کراوە، ماوەی چەند رۆژێکە هەندێک لایەن لەپێناو نانەوەی پشێویی و ناسەقامگیریی لە سووریا هەوڵی هاندانی بەشێک لە کۆمەڵگەی سووریا دەدەن”.
هاکان فیدان نووسیویەتی: “کارێکی دروستنییە رووداوەکان بخرێنە ئەستۆی مەزهەبێک یاخود گرووپێکی ئایینی دژی ئەو کارە تێکدەرانەیەی ئامانجیەتی گرژییەکان بۆ پێکدادانی مەزهەبی بگۆڕێت، ئێجگار گرنگە بە میانڕەوی و هۆشیارییەوە مامەڵە بکرێت”.
ئەمە لەکاتێکدایە بەگوێرەی زانیارییەکانی روانگەی سووریی بۆ مافەکانی مرۆڤ، لە شەڕ و پێکدادانەکانی چەند رۆژی رابروودا هەزار و 18 کەس لەلایەن گرووپە چەکدارەکانی سەربە ئەحمەد شەرعەوە کوژراون، لەو ژمارەیەش 745ـیان هاوڵاتیی عەلەویی سڤیلن.
