قەندیل پرێس
سیپان حەمۆ، ئەندامی فەرماندەیی گشتیی هەسەدە ڕایگەیاند، لە ناوچە عەرەبییەکاندا سەبارەت بە تێڕوانینی گشتی بۆ دیموکراسیخوازی سوریا بەو ئەندازەیەی دەمانویست سەرکەوتو نەبوین و هەمو ئەو ڕەخنانەی گەلی کورد ئاراستەی ئێمەی دەکات بەنرخ و ڕەوان. دەشڵێت، “چوار لیوای سەربازی دروستدەكرێن كە 90%ـی هێزە سەربازییەکان لە کورد پێکدێن. 10%ی تریش لە سریانی و عەرەب پێکدێن وپاراستنی ناوچە كوردییەكانیش لای هێزەكانی ئەوان دەبێت”.
سیپان حەمۆ، كە هاوكات فەرماندەی گشتی یەپەگەیە بە “نومیدیا 24″ـی ڕاگەیاند، شەڕی ئەمدواییە، “شەڕی مەیدانی” نەبوە، بەڵکو “بەرگرییەک بوە دژی پلانێکی گشتگیری قڕکردن کە ئامانجی لەناوبردنی بونی کورد بوە”. بە وتەی حەمۆ، ڕێککەوتنەکە بۆ یەکەمجار دانی بە بونی سیاسی و ئیداریی کورد لە سوریادا ناوە؛ لە هەمان کاتدا نیشانەی ئەوەیە کە خەبات لە ڕەهەندی سەربازییەوە بۆ قۆناغێکی سیاسی و یاسایی گۆڕاوە.
ئاماژەی بەوەشكرد، ڕێککەوتنێکی گەورە لە نێوان هێزە ناوچەیی و جیهانییەکاندا هەبوو دژی بون و دەستکەوتەکانی گەلی کورد. پلانەکە ئەوە بو کە بەم هێرشانەی دوایی، ئەوەی شۆڕشەکەمان دروستیکردبو لەگەڵ هەسەدە بە تەواوی لەناو ببرێن. هێزەکانمان دژی ئەم پلانە، بۆ پاراستنی دەستکەوتەکان چوە ناو شەڕێکی بەرگریی سەختەوە. لە ماوەیەکی کورتدا هەم هێزە هێرشبەرەکان و هەم پشتیوانەکانیان درکیان بەوەکرد کە ئەم شەڕە دەرئەنجامی زۆر قورسی بۆ هەمو سوریا دەبێت.
سیپان حەمۆ لەبارەی ڕێككەوتنەكەی هەسەدە و دیمەشەوە دەڵێت، ئێمە ئەمە وەک سەرکەوتنێک بۆ گەلی کورد دەبینین. ئەو پلانەی وەک لوتکەی سیاسەتەکانی ئینکاری 100 ساڵی ڕابردو بەسەرماندا سەپێنرابو، بە بەرگری و پشتیوانی گەلەکەمان و بە واژۆکردنی ڕێککەوتنەکە تێکشکا. ئەمڕۆ پەسەندکردنی ویلایەتێک بە ناوی “ناوچە کوردییەکان”، پێگەی سیاسی گەلەکەمان دەردەخات و بەسەر هێزە ناوچەیی و جیهانییەکاندا دەیسەپێنێت.
ئەوەشیخستەڕو، کاتێک باس لە ئەنجامە بەدەستهاتوەکان دەکەین، بێگومان نابێت تەنیا لەسەر کەموکوڕییەکانمان پەکمان بکەوێت. بەڵام بێگومان لەم پرۆسەیەدا هەڵەمان کردوە و گەلەکەمان مافی خۆیەتی ڕەخنەمان لێ بگرێت. وەک هێزی بەرگری و ئیرادەی سیاسی، دەبێت ئاماژە بەوە بکەین کە دەستمانکردوە بە هەڵسەنگاندنی گشتگیری ئەنجامەکانی پرۆسەکە.
سیپان حەمۆ باسی لەوەشكرد، “ڕەنگە زۆر کەس ئێستا لێمان بپرسن ئامانجی سەرەکیمان چییە. زۆر بە ڕونی و ئاشکرا ئەمە ڕادەگەیەنین: ئازادی کورد، پاراستنی ناسنامە و پێگەی سیاسییان لە سەروی هەمو شتێکەوە دەبێت. کورتەکەی، دەبێت کورد ئیرادەی خۆی هەبێت. دوەم، ئێمە یەکسانی و دیموکراسیمان بۆ هەمو سوریا و مرۆڤایەتی دەوێت”.
دەشڵێت، “لە ڕابردودا هەوڵماندا مۆدێلی کۆمەڵایەتی و سیاسی خۆمان لە سوریا بڵاو بکەینەوە، بەڵام ئەمە بەو شێوەیە نەبو کە ئارەزومان دەکرد. دەبێت بڵێین کە لە ناوچە عەرەبییەکاندا سەبارەت بە تێڕوانینی گشتی بۆ دیموکراسیخوازی سوریا بەو ئەندازەیەی دەمانویست سەرکەوتونەبوین. دەبێت بڵێین هەمو ئەو ڕەخنانەی گەلی کورد ئاراستەی ئێمەی دەکات بەنرخ و ڕەوان، گەلی کورد مافی خۆیەتی ئێمە بە بەرپرسیار بزانێت لە پەرەسەندنەکان”.
لەبارەی چارەنوسی هێزە سەربازییەكانیشەوە دەڵێت، “هێزەکانمان لە ناوچە کوردییەکان بەسەر چوار لیوادا دابەشدەكرێن. ئەم لیوایانە لە دێرک، قامیشلۆ، حەسەکە و کۆبانێ جێگیر دەکرێن. سێ لیواکەی ناوچەی جەزیرە دەبنە فیرقەیەک و لیوای کۆبانێش لە ڕوی ئیدارییەوە کوردی دەبێت و سەر بە حەلەب دەبێت، هەروەها 90%ـی هێزە سەربازییەکان لە کورد پێکدێن. 10%ی تریش لە سریانی و عەرەب پێکدێن”.
وتیشی، “هەڵە نییە ئەگەر بڵێین هێزی بەرگری هەر هێزی کوردی دەبێت. بابەتێکی تری بنەڕەتی لێرەدا پرسی ئاسایشی ناوخۆ یان پۆلیسە (ئاسایش). بەگوێرەی ڕێککەوتنەکە، پارێزگاری حەسەکە لەلایەن ئێمەوە دادەنرێت. بەرپرسی ئەمنیش لەلایەن شامەوە دادەنرێت. هەروەها قایمقامەکانی قەزا و ناوەندە ئەمنییەکانی حەسەکە، قامیشلۆ و دێرک لەلایەن ئێمەوە دادەنرێن. لە ئەنجامدا، ئاسایشی ناوخۆی ناوچە کوردییەکان لەلایەن هێزەکانمانەوە دەپارێزرێت”.
پێكدانانەكانی مانگی ڕابردوی نێوان هەسەدە و دیمەشق لهو كاتهوه دهستیپێكرد كه هێزهكانی وهزارهتی بهرگری سوریا له 6ی (كانونی دوهم/1)ی 2026 هێرشیانكرده سهر گهڕهكهكانی شێخ مهقسود و ئهشرهفیه له شاری حهلهب، ئۆپراسیۆنهكه له 13ی ههمان مانگهوه دهستیپێكردهوه و ئهو پێگانهی كرده ئامانج كه لهلایهن هێزهكانی سوریای دیموكراتهوه له باكوری ڕۆژههڵاتی سوریا كۆنتڕۆڵكرابون.
هێرشهكه له ڕۆژههڵاتی پارێزگای حهلهب له دهوروبهری شارۆچكهكانی دێرحافر و مهسكانه دهستیپێكرد، پاشان له 17ی مانگی (كانونی دوهم/1) بۆ پارێزگاكانی ڕهقه و دێرهزۆر فراوانتر بو، هێرشهكه ئێوارهی 18ی مانگ به واژۆكردنی ڕێككهوتنێكی 14 خاڵیی لهلایهن ئهحمهد شهرع به نێوهندگیری تۆم باراك نێردهی تایبهتی ئهمریكا له سوریا بۆ ماوهیهكی كاتی ڕاگیرا، بهڵام دواتر دهستیپێكردهوه تاكو لە ڕۆژی 30 هەمان مانگدا ڕێككەوتنێكی گشتگیرتر ئەنجامدرا و شەڕ ڕاگیرا.
