قەندیل پرێس
وەزارەتى دەرەوەى سووریا، پێشوازی لە بڕیارەکەی ئەمریکا دەکات بۆ هەڵگرتنى سزاکانی سەر وڵاتەکەى و دەڵێت: قۆناغی داهاتوو قۆناغى بنیادنانەوەی ئەو دامەزراوانە دەبێت کە لەلایەن رژێمی پێشووەوە وێرانکرابوون.
بەرەبەیانی ئەمڕۆ شەممە، 24ى ئایارى 2025، وەزارەتی دەرەوەی سووریا راگەیەندراوێکى بڵاوکردووەتەوە و ئاماژەى بەوەکردووە، پێشوازی لە بڕیارەکەى ئەمریکا دەکەن بۆ هەڵگرتنی ئەو سزایانەی ساڵانێکە بەسەر وڵات و گەلەکەیدا سەپێندراون.
وەزارەتەکە هەڵگرتنى سزاکانى بە هەنگاوێکی ئەرێنی بە ئاراستەیەکی دروست ناوبردووە بۆ کەمکردنەوەی سزا ئابوورییەکانی سووریا، جەخت لەوەشدەکاتەوە پێشوازى لە هەموو ئەو کەس و لایەنانە دەکەن دەیانەوێت لەسەر بنەمای رێزگرتنی یەکتر و دەستوەرنەدان لە کاروباری ناوخۆ هاوکارییان بکەن.
وەزارەتی دەرەوەی سووریا دووپاتیکردووەتەوە، گفتوگۆ و دیپلۆماسی باشترین رێگەن بۆ بنیادنانی پەیوەندیی هاوسەنگ کە بەرژەوەندی گەلان بەدیبهێنێت و ئاسایش و سەقامگیری لە ناوچەکەدا بەرقەرار بکات.
وەزارەتەکە پێزانینی خۆی بۆ هەموو ئەو وڵات و دامەزراوە و گەلانە دەربڕی کە هاوکارى دەکەن و گوتى، قۆناغی داهاتوو قۆناغێک دەبێت لە بنیادنانەوەی ئەو دامەزراوانەى لەلایەن رژێمی پێشووەوە وێرانکرابوون، هەروەها گەڕاندنەوەی پێگەی سووریا لە ناوچەکە و جیهاندا.
رۆژى هەینى وەزارەتی خەزێنەی ئەمریکا، بەفەرمی سزا ئابوورییەکانی سەر سووریای هەڵگرت، هەڵگرتنی سزاکان بە مەرجێکە ئەو وڵاتە نەبێتە پەناگەیەکی پارێزراو بۆ رێکخراوە تیرۆریستییەکان و ئاسایشی کەمە نەتەوایەتی و ئاینییەکان پارێزراوبن.
مارکۆ روبیۆ وەزیری دەرەوەی ئەمریکا لە راگەیەندراوێکدا دەڵێت، هەڵگرتنی سزاکان ئاسانکاری دەکات بۆ دابینکردنی خزمەتگوزاریی کارەبا، وزە، ئاو، ئاوەڕۆ و گەیاندنی هاوکارییە مرۆییەکان بەشێوەیەکی کاریگەرتر.
لەماوەی جەنگی سووریادا کە 14 ساڵی خایاند، ئەمریکا کۆتوبەندی گشتگیری بەسەر مامەڵە داراییەکان لەگەڵ ئەو وڵاتەدا سەپاند، هەروەها سزای ئابووریی بەسەر هەر کەس و لایەنێکدا دەسەپاند کە بەشداری لە ئاوەدانکردنەوەی سووریادا بکەن تاوەکو ئەو کاتەی ئەسەد لە دەسەڵاتدا بێت.
