قەندیل پرێس
قەندیل پرێس
عەبدوڵڵا ئۆجالان ڕێبەری زیندانیکراوی پەکەکە دوای نێزیکەی مانگێک لە بێدەنگی، بەبۆنەی ١ـی ئەیلول، ڕۆژی جیهانیی ئاشتییەوە، پەیامێکی نوێ بڵاوکردەوە کە لە میانی “کەرنەڤاڵی ئاشتی” لە ئیستانبوڵ خوێندرایەوە و لەلایەن ئامادەبووانیشەوە بە چەپڵەڕێزان پێشوازی لێ کرا.
ئۆجەلان لەپەیامەکەیدا راگەیاند: “بانگەوازەکەمان بۆ ئاشتی و چارەسەری دیموکراتیک، هەنگاوێکی سیاسیی ئاسایی نییە؛ بەڵکوو هەنگاوێکی ستراتیژیی و قۆناغێکی مێژووییە”.
ئاماژەی بەوەش کردووە، بەم بانگەوازە، هەم لە تورکیا و هەم لە سەرانسەری ڕۆژهەڵاتی ناوەڕاست، دەرگای سەردەمێکی نوێ کراوەتەوە.
عەبدوڵڵا ئۆجەلان جەختی لەوەش کردووە، ئەمە تەنها داخوازییەک نییە، بەڵکوو ڕاستییەکی بەرجەستەیە و پێویستە بە هەلی بەهێز و هەنگاوی پراکتیکی بەدی بهێنرێت. چونکە ئاشتییەکی ڕاستەقینە، تەنها بە بێدەنگکردنی چەک و کۆتاییهاتنی شەڕ و پێکدادان، بەدی نایەت و دەڵێت: “ئاشتی ڕاستەقینە تەنها بێدەنگبوونی چەکەکان و کۆتاییهێنان بە پێکدادانەکان بەدی نایەت، بەڵکوو ئاشتیی ڕاستەقینە بە هێنانەدی ئازادی، دیموکراسی و دادپەروەری کۆمەڵایەتی لە تەواوی بوارەکانی ژیان بەدی دێت و ئەمە ئەرکی سەرەکی قۆناغی نوێی ئەم وەرچەرخانە کۆمەڵایەتییە دەبێت”.
ئۆجەلان سەرنج دەخاتە سەر ئەوەی کە بە خەباتی گەلان بە دڵنیاییەوە بەهاکانی ئازادی، دیموکراسی و ئاشتی ڕەگ دادەکوتن و دەڵێت: “لە ژیانی کۆمەڵایەتیدا ڕەنگ دەداتەوە و ئیدی ئەم وڵاتە دەبێتە نیشتمانی ئەوانەی ئاشتی و دیموکراسی هەم وەک ماف و هەم وەک ئەرک دەبینن”.
ئۆجەلان داواش لە گەلانی تورکیا دەکات بە بۆنەی ڕۆژی جیهانیی ئاشتییەوە داکۆکی لەو ئەرکە مێژووییە بکەن و بەگوڕتر و بەرفراوانتر بەشداری لە ڕێپێوانەکانی ئاشتی و ئازایدا بکەن.
عەبدوڵڵا ئۆجەلان سەرنج دەخاتە سەر ئەوەی کە پێویستە هەموو کەسێک بەخۆیدا بچێتەوە و لە جیدیەتی ئەم قۆناغە تێ بگات و بە ڕۆحیەتێک کە خزمەتی ئاشتی دەکات هەڵسوکەوت بکات و سڵاو لە هەموو لایەکیش دەکات و خۆشەویستی بێپایانی خۆیان بۆ دەردەبڕێت.
