قەندیل پرێس
قەندیل پرێس – قامشلۆ
پەروین یوسف، هاوسەرۆکی پارتی یەکێتی دیموکرات (PYD)، لە لێدوانێکی تایبەتدا هەڵوەستەی لەسەر دوایین پێشهاتە سیاسییەکان و دۆخی جەماوەریی ناوچەکە کرد.
ناوبراو سەرەتا بە بایەخێکی زۆرەوە باسی لەو شەپۆلە گەورەیەی هاوسۆزییە کرد کە لە هەر چوار پارچەی کوردستان و تاراوگەوە بۆ پشتیوانی لە ڕۆژئاوا دەستی پێکردووە.
ئەو پێی وایە ئەم دیمەنانەی لە باکوور، باشوور، ڕۆژهەڵات و ئەوروپا بینران، بەڵگەیەکی حاشاهەڵنەگرن بۆ ئەوەی کە گەلی کورد سەرەڕای سنوورە دەستکردەکان، خاوەنی یەک چارەنووسە و ئەم یەکگرتووییەی جەماوەریش جێگای شانازییەکی گەورەیە بۆ بزووتنەوەی ڕزگاریخوازی کورد.
بەڵام هاوسەرۆکی پەیەدە نیگەرانییە قووڵەکانی خۆی سەبارەت بە پەرتەوازەیی لە ناو ماڵی کوردی نەشاردەوە و بە توندی ڕەخنەی لە هەڵوێستی هەندێک لایەنی سیاسی گرت. ئەو بە ئاشکرا ئاماژەی بە جوڵەکانی ئەنجومەنی نیشتمانیی کوردی (ئەنەکەسە) کرد و ڕایگەیاند کە لە کاتێکدا هەموو هەوڵەکان بۆ کۆکردنەوەی دەنگی کوردە لە بەرەیەکی یەکگرتوودا، شاندێکی ئەو ئەنجومەنە بەبێ ئاگاداری و هەماهەنگی لەگەڵ لایەنەکانی تری ناو شاندی دانوستانکار، سەردانی شامیان کردووە.
ئەم هەنگاوەی ئەنەکەسە لای پەروین یوسف وەک کارێکی تاکلایەنانە و نابەرپرسانە دەبینرێت کە نەک هەر خزمەت بە دۆزی ڕەوای گەلەکەمان ناکات، بەڵکو دەبێتە هۆی لاوازکردنی پێگەی کورد لە دانوستانە نێودەوڵەتییەکاندا و دەرفەت بۆ نەیاران دەڕەخسێنێت.
لە درێژەی قسەکانیدا، پەروین یوسف وەڵامی ئەو پاساوانەی دایەوە کە ئەو جۆرە سەردانانە وەک سەربەخۆیی سیاسی دەبینن و جەختی کردەوە کە ناونانی ئەم جۆرە جوڵانە بە سەربەخۆیی تەنها خۆخەڵەتاندنە، چونکە هەر هەنگاوێک کە یەکڕیزیی نەتەوەیی تێکبدات، لە کۆتاییدا تەنها خزمەت بە ئەجێندای دوژمنانی کورد دەگەیەنێت. ئەو دووپاتی کردەوە کە وەک شاندی دانوستانکار، ئەوان بە تەواوی پابەندی ئەو پەیمان و بڕیارانەن کە لە کۆنفرانسی یەکڕیزیی نەتەوەییدا لەسەری ڕێککەوتوون.
لە کۆتایی لێدوانەکەیدا، هاوسەرۆکی پەیەدە پەیامێکی ئاراستەی کۆمەڵگەی کوردی کرد و داوای لێکردن وەک هەمیشە چاوکراوە بن و فشار بخەنە سەر هەموو لایەنە سیاسییەکان تاوەکو بەرژەوەندییە نەتەوەییە باڵاکان نەکەنە قوربانیی ململانێ و بەرژەوەندییە تەسکە حزبییەکان. ئەو جارێکی تر دەستخۆشی لەو جەماوەرە کرد کە لە شەقامەکاندا دەنگی خۆیان دژی داگیرکاری بەرز دەکەنەوە و هیوا و متمانەی خۆی بۆ سەرکەوتنی کۆتایی گەلی کورد دەربڕی.
