قەندیل پرێس
بەرەبەیانی ڕۆژی یەکشەممە، ٦ی بانەمەڕی ١٤٠٥، دەزگای دادی ڕێژیمی ئێران حوکمی لەسێدارەدانی “عامر ڕامش”ی بە تۆمەتی ئەندامییەتی لە ڕێکخراوی “جەیشولعەدل” جێبەجێ کرد.
عامر ڕامش لە ڕەزبەری ١٤٠٣دا، لە کاتێکدا تەمەنی تەنیا ١٨ ساڵ بوو، لە کاتی هێرشی هێزە ئەمنییەکان لە شاری چابەهار بە برینداری دەستبەسەر کرابوو.
بەپێی ڕاپۆرتی سەرچاوەکانی مافی مرۆڤ، دەزگای دادوەریی ڕێژیم تەنیا پشتی بە دانپێدانانی زۆرەملێی ناوبراو بەستووە. ئەمە لە کاتێکدایە کە لە ڤیدیۆ بڵاوکراوەکانی دانپێداناندا، ئاسەواری ئەشکەنجە، برینداری و شینبوونەوە بە دەموچاوی عامر ڕامشەوە بە ڕوونی دیار بووە و ناوبراو بۆ ماوەی چەندین مانگ لە مافی چاوپێکەوتن لەگەڵ بنەماڵەکەی بێبەش کرابوو.
