قەندیل پرێس
قەندیل پرێس
ساڵح موسلیم، ئەندامی دەستەی سەرۆکایەتی پارتی یەکێتی دیمۆکراتیک (پەیەدە) بە قەندیل پرێسی راگەیاند؛ “ئەو گروپە چەکدارانەی هێرشی گەڕەکەکانی شێخ مەقسوود و ئەشرەفیەی حەلەب دەکەن، لە ژێر کۆنترۆل و فەرمانی حکومەتی کاتی سوریادا نین، بەڵکو ڕاستەوخۆ سەر بە تورکیان”.
دەربارەی هۆکار و ئامانجی هێرشی گروپە چەکدارەکان بۆ سەر گەڕەکە کوردیەکانی حەلەب، ساڵح موسلیم دەڵێت: “ تورکیا بە رێگای ئەم هێرش و گروپە چەکدارانە دەیانەوێت کورد بترسێنن و فشار دروست بکەن تا ڕادەستی خواست و داواکاریەکانی تورکیا ببن، بەڵام ئەم هەوڵ و فشارانە هیچ ئەنجامێکیان نابێت”.
درەنگی ئەمشەو 22/23ـی کانونی یەکەمی 2025 دوای گەیشتنی وەفدی تورکیا بۆ دیمەشق گرووپە چەکدارەکانی سەر بە حکومەتی سوریا دیسان هێرشیان بۆ گەڕەکە کوردییەکانی حەلەب دەستپێکردەوە و شەڕ کەوتە نێوان هەسەدە و هێزەکانی حکومەتی سوریا.
هەسەدە لە ڕاگەیەندراوێکدا رایگەیاند، هێرشی بەردەوام بۆ سەر گەڕەکەکانی شێخ مەقسوود و ئەشرەفیە لە شاری حەلەب، بە بەکارهێنانی هاوەن و چەکی قورس لەلایەن گرووپەکانی سەر بە حکومەتی دیمەشقەوە بووە هۆی برینداربوونی 17 هاووڵاتیی مەدەنی و کوژرانی هاوڵاتیەکی تەمەن 57 ساڵ، لەنێویاندا منداڵ هەیە.
هێرشەکە سەلمێنەری ئەوەیە دیمەشق ناتوانێت گرووپە چەکدارەکانی کۆنتڕۆڵ بکات، ئێمە دیمەشق بە بەرپرسیاری تەواوی ئەم هێرشانە دەزانین.
گەڕەکەکانی شێخ مەقسوود و ئەشرەفیە لە حەلەب، کە زۆرینەی دانیشتووانەکەی کوردن و بەشێکی ئەرمەنی و کریستیانەکانیش تێدا دەژین، لەژێر کۆنترۆڵی هێزەکانی سەر بە هەسەدەدان و دوای رێککەوتنی 10ـی ئازاری نێوان هەسەدە و حکومەتی دیمەشق لە 1ی نیسانی 2025 رێککەوتنێکی دیکەی ئەمنی دەربارەی گەڕەکە کوردیەکانی حەلەب ئیمزا کرا، کە هێزی هاوبەشی ئاسایشی ناوخۆی هەسەدە و وەزارەتی ناوخۆی سوریا بەرێوەببەن، بەڵام ئەمە دووەم جارە دوای ئەو رێککەوتنە شەڕ لە نێوان هەردوو لادا ڕوودەدات.
