قەندیل پرێس
بەهای دراوی ئێرانی (تمەن) دابەزینێکی پێوانەیی تۆمار کرد و گەیشتە نزمترین ئاستی ئەمساڵ، هۆکارەکەشی بۆ کاراکردنەوەی سزاکانی سەر تاران دەگەڕێتەوە.
100 هەزار تمەن بەرامبەر 1250 دینارە
بەگوێرەی بازاڕی ئاڵوگۆڕی دراو، لە تاران و سلێمانی نرخی 100 دۆلاری ئەمریکی گەیشتووەتە 11 ملیۆن و 600 هەزار تمەن. دانا مەولود، مامەڵەکاری دراو لە بازاڕی دۆلارەکەی سلێمانیاش ڕایگەیاند، بەهای 100 هەزار تمەنی ئێرانی بەرامبەر هەزار و 250 دیناری عێراقییە و یەک ملیۆن تمەنیش دەکاتە 12 هەزار و 500 دینار.
بەهۆی زۆرییەوە تمەنی کاش دابەزیوە
سەبارەت بە جیاوازیی نرخی تمەنی کاش و حەواڵە، ئەو مامەڵەکارە ئاشکرای کرد کە بەهۆی هاتنی بڕێکی زۆر تمەنی کاش لە باشووری عێراقەوە بۆ سلێمانی، بەهای تمەنی کاش زیاتر دابەزیوە و لەو مامەڵەیەدا 100 دۆلار بەرامبەر 11 ملیۆن و 400 هەزار تمەنە.
لەدەستدانی 36%ـی بەهاکەی
لە ماوەی ساڵی 2025ـدا تمەن 36%ـی بەهاکەی بەرامبەر دۆلار لەدەستداوە. لە سەرەتای ئەمساڵدا 100 دۆلار بەرامبەر حەوت ملیۆن و 500 هەزار تمەن بوو، بەڵام لە تشرینی دووەمدا گەیشتووەتە 11 ملیۆن و 600 هەزار تمەن، واتە بۆ هەر 100 دۆلارێک چوار ملیۆن و 100 هەزار تمەن دابەزیوە.
سزاکانی “سناپ باک” کاریگەرییان هەبووە
هۆکاری سەرەکیی ئەم دابەزینە خێرایە دەگەڕێتەوە بۆ بڕیاری ڕۆژی 28ـی ئەیلول، کاتێک سێ وڵاتی ئەوروپی (فەڕەنسا، بەریتانیا و ئەڵمانیا) میکانیزمی “سناپ باک”ـیان کارا کرد. بەمەش سزاکانی پێش ساڵی 2015ـی نەتەوە یەکگرتووەکان بۆ سەر ئێران گەڕێنرانەوە، کە کاریگەریی راستەوخۆی لەسەر دەروونی بازاڕ دروست کردووە.
