قەندیل پرێس
لێبووردنی نێودەوڵەتیی بڵاوی کردەوە، ١٣ خۆپیشاندەر لەبەردەم مەترسیی جێبەجێکردنی سزای لەسێدارەدان دان؛ دەسەڵاتی دادوەریی ئێران لەسێدارەدانی دژی زیندانییانی سیاسی و بەشداربووانی خۆپیشاندانەکانی زیاد کردووە.
ڕێکخراوی لێبووردنی نێودەوڵەتیی سەبارەت بە مەترسیی جێبەجێکردنی سزای لەسێدارەدانی ١٣ خۆپیشاندەر لە ئێران، ڕاپۆرتێکی بڵاو کردەوە و هۆشداری دەدات.
لە ڕاپۆرتەکەدا هاتووە، ئەو ١٣ خۆپیشاندەرەی کە سزای لەسێدارەدانیان بەسەردا سەپێندراوە، سەرجەمیان مەترسیی لەسێدارەدانیان لەسەرە؛ ئەوان بە مەبەستی دانپێدانانی زۆرەملێ، ڕووبەڕووی ئەشکەنجە و قامچی لێدان بوونەتەوە، لە ژووری تاکەکەسیدا ڕاگیراون و لە دادگایەکی نادادپەروەرانەدا دادگایی کراون.
ئاماژە بەوەش کراوە، دەسەڵاتی دادوەریی ئێران لەسێدارەدانی سەرەڕۆیانە دژی زیندانییانی سیاسی و بەشداربووانی خۆپیشاندانەکانی زیاد کردووە، وەک ئامرازێک بۆ بڵاوکردنەوەی ترس لەناو کۆمەڵگە و بێدەنگکردنی دەنگی ناڕەزایەتییەکان.
ڕێکخراوی لێبووردنی نێودەوڵەتیی لە ڕاپۆرتەکەدا، دانپێدانانی زۆرەملێی وەک شێوازێکی جێگیر لە دۆسییە ئەمنییەکان و دژی نەیارانی سیاسی، کورد و نەتەوەکانی تر پێناسە کردووە.
ئەو هۆشدارییەی لێبووردنی نێودەوڵەتیی لەکاتێکدایە، هەڵمەتی سزای لەسێدارەدانی زیندانیانی سیاسیی و خۆپیشاندەران لە ماوەی دوو مانگی ڕابردوودا خێراتر بووە؛ چاودێرانی مافی مرۆڤ ئەم دۆخە بە نیشانەی چوونە ناو قۆناغێکی توندتری سەرکوتکردن لەلایەن دەسەڵاتەوە هەڵدەسەنگێنن و داوا لە کۆمەڵگەی نێودەوڵەتیی دەکەن لە بەرانبەر لەسێدارەدانەکاندا بێدەنگ نەبن.
