قەندیل پرێس
ناوەندی راگەیاندنی هێزەكانی سوریای دیموكرات رایگەیاند “چەتەكانی دەوڵەتی داگیركەری تورك دوێنێ یەكشەممە بەهاوكاری فڕۆكەی جەنگی و فڕۆكەی بێفڕۆكەوانی دەوڵەتی داگیركەری تورك، لە دەوروبەری بەنداوی تشرین هێرشێكیان ئەنجامدا، هەوڵیاندا هێرش بكەنە سەر خاڵێكی شەڕڤانانمان، شەڕڤانانمان وەڵامی هێرشەكەیان دایەوە و لە ئەنجامدا شەڕ ڕوویدا و ژمارەیەك چەتە كوژراون و هەندێكیش برینداربوون”.
هەسەدە لە راگەیەندراوێكدا وردەكاری شەڕ و پێكدادانەكانی لە ماوەی 24 كاتژمێری رابردوودا بڵاوكردوەتەوە و تێیدا هاتووە “لە بەرەی دێرحافریش، چەتەكان بە هاوكاری فڕۆكە بێفڕۆكەوانەكانی دەوڵەتی داگیركەری تورك هێرشیان كردە سەر خاڵێكی شەڕڤانانمان، شەڕڤانانمان وەڵامیان دایەوە و شەڕێكی سەخت ڕوویدا لە نێوانیاندا و لە ئەنجامدا شەڕڤانان خاڵێكی سەربازیی چەتەكان و ماتۆڕسكیلێكیان تێكشكاند.”
دەشڵێت “فڕۆكە جەنگییەكانی دەوڵەتی داگیركەری تورك گوندەكانی تینا و مەلهایان لە دەوروبەری پردی قەرەقۆزاق بۆردوومان كرد، لە ئەنجامدا زیانی مادی لێكەوتەوە، لەهەمان كاتدا گوندەكانی تینا، جادە، بیرۆ هسۆ، خەسەق، دیكان، مەلها و سنا، گردی سێڤێ و قەرەقۆزاق بە زیاتر لە ٨٠ گولـە تۆپ، تانك، موشەك و هاوەن تۆپباران كران و لە ئەنجامدا زیان گەیشت بە ماڵ و موڵكی هاوڵاتیان. هەروەها چەتەكان بە هاوكاری فڕۆكە هەوڵیاندا هێرش بكەنە سەر خاڵەكانی هێزەكانمان، شەڕڤانانمان وەڵامیان دایەوە و شەڕ ڕوویدا، لە ئەنجامدا هێرشەكە تێكشكێندرا و ژمارەیەك چەتە كوژران و بریندار بوون”.
