قەندیل پرێس
قەندیل پرێس – تایبەت
دکتۆر مورشید خەزنەوی، کەسایەتیی دیاری ئایینیی ڕۆژئاوای کوردستان، لە لێدوانێکی تایبەتدا بۆ قەندیل پرێس، سەرلەبەری ئەو لێدوان و وتانەی ڕەتکردەوە کە لە چەند پەیج و میدیایەک بە تایبەت لە باشووری کوردستان بە ناوی ئەوەوە لەسەر دۆخی ڕۆژئاوای کوردستان و لایەنە سیاسییەکان بڵاوکراونەتەوە.
لە چەند ڕۆژی ڕابردوودا، دەقێک بە ناوی د. مورشید خەزنەوی بڵاوکرایەوە کە تێیدا ڕەخنەی توند لە هێز و لایەنە سیاسییەکانی ڕۆژئاوای کوردستان گیرابوو، لەوانە گوایە وتوویەتی: «ئێوە چیتر نوێنەری گەل نین»، «دوای ١٢ هەزار شەهید هیچی بۆ کورد تێدا نەبووە»، و هێرشکردنە سەر مێژووی لایەنە سیاسییەکان لە ساڵی ١٩٥٧ـەوە تا ئێستا.
لەم بارەیەوە، د. مورشید خەزنەوی بە «قەندیل پرێس»ی ڕاگەیاند: «من هیچ لێدوانێکم لەو شێوەیە بڵاو نەکردووەتەوە، نە لێدوانم داوە و نە کۆمێنتم لەسەر ئەو ڕووداوانە کردووە. هەموو ئەو دەقانەی بە ناوی منەوە لەو بارەیەوە دەستاودەست دەکرێن، هەڵبەستراون و دوورن لە ڕاستییەوە.
خەزنەوی جەختی کردەوە کە پێویستە میدیاکان و هاووڵاتییان لە گواستنەوەی زانیاریدا پشت بە کەناڵ و سەرچاوە فەرمییەکان ببەستن و ڕێگە نەدەن وتەی ناڕاست و هەڵبەستراو بە ناوی کەسایەتییەکانەوە بڵاوبکرێتەوە.
