قەندیل پرێس
گوتەبێژی ئاکپارتی رایگەیاند، ئامانجی سەرەکیی ئەوان هەڵوەشاندنەوە و چەکدانانی پارتی کرێکارانی کوردستان (پەکەکە)یە و جەختی کردەوە، دەبێت ئەو حیزبە لە هەموو باڵەکانییەوە لە عێراق، ئێران و سووریا چەک دابنێت.
بەگوێرەی قسەکانی عومەر چەلیک، میکانیزمێکی پشتڕاستکردنەوە بۆ چاودێریکردنی پرۆسەی چەکدانانەکە دامەزراوە و گوتی، “چاوی سوپای تورکیا و دەزگای هەواڵگریی نیشتمانی (میت) لەسەر گۆڕەپانەکەیە، بۆ ئەوەی دڵنیا ببنەوە، کە ئایا بەڕاستی چەک دادەنرێت و ئایا ئەم چەکدانانە بە واتای هەڵوەشاندنەوەی پەکەکە دێت.”
گوتەبێژی ئاکپارتی کۆما جڤاکێن کوردستان (کەجەکە) بە “لایەنی دارایی” پەکەکە وەسف دەکات و دەڵێت، دەبێت هەڵبوەشێنرێتەوە.
سەبارەت بە شێوازی جێبەجێکردنی پرۆسەکە، عومەر چەلیک روونیکردەوە، لەوانەیە لە عێراق و سووریا جیاواز بێت؛ لە عێراق لە رێگەی چەکدانانەوە دەبێت و لە سووریاش لە رێگەی پابەندبوون بە رێککەوتنی 10ی ئادار.
عومەر چەلیک گوتی کە پشتڕاستکردنەوەی کۆتایی لەلایەن سوپای تورکیا و میتەوە دەبێت و ئەو میکانیزمەی کە بڕیار لەسەر ئەمە دەدات، “لە چوارچێوەیەکدا دەبێت کە بە بڕیاری بەڕێز سەرۆککۆمارمان دادەمەزرێت.”
