قەندیل پرێس
قەندیل پرێس
پاش 10 ساڵ لە بوونی وەک یەکێک لە ئاڵۆزترین دۆسیە مرۆیی و ئەمنییەکان لە جیهاندا، بەرپرسانی خۆجێی لە باکووری ڕۆژهەڵاتی سووریا ڕایانگەیاند کە کەمپی “هۆڵ” بە تەواوی چۆڵکرا و دەرگاکانی داخران.
بەیانی ڕۆژی هەینی، 23ـی شوباتی 2026، دوایین کاروانی ئاوارەکان کە لە 17 خێزان پێکهاتبوون، خاکی کەمپەکەیان بەرەو ناوچە ڕەسەنەکانی خۆیان جێهێشت.
فادی قاسم، نوێنەری لایەنە پەیوەندیدارەکان بۆ کاروباری بەڕێوەبردنی کەمپەکە، ڕایگەیاند کە بە چۆڵکردنی دوایین کاروان، دۆسیەی کەمپی هۆڵ بوو بە مێژوو.
پڕۆسەی چۆڵکردنەکە لەژێر سەرپەرشتی “یەکەی پاڵپشتی سەقامگیری” و بە هەماهەنگی لەگەڵ کۆمیسیۆنی باڵای پەنابەرانی سەر بە نەتەوە یەکگرتووەکان ئەنجامدرا. دانیشتووانی کەمپەکە دابەشکران لە نێوان گەڕانەوە بۆ ناوچە ڕەسەنەکانی خۆیان لە سووریا، گواستنەوە بۆ کەمپی “ئەختەرین” لە پارێزگای حەلەب، و گەڕاندنەوەی بەشێکی تریان بۆ وڵاتی عێراق.
ئەم کەمپە کە لە ساڵی 2016 بۆ پێشوازیکردن لە ئاوارەکانی شەڕی دژی داعش کرابووەوە، لە لوتکەی قەرەباڵغی خۆیدا زیاتر لە 73 هەزار کەسی لەخۆ دەگرت. ناوەندە نێودەوڵەتییەکان بەردەوام هۆشدارییان دەدا لەسەر مەترسییەکانی ئەم کەمپە، بەڵام ئێستا داخستنی وەک هەنگاوێکی گرنگ بەرەو سەقامگیری ناوچەکە هەژمار دەکرێت.
