قەندیل پرێس
وەزیری دەرەوەی تورکیا مەرجی سەقامگیریی سووریا دەبەستێتەوە بە هەڵوەشاندنەوەی دەسەڵاتی سەربازیی هەسەدە و ڕایدەگەیێنێت، ئەگەر نەچنە ژێر فەرمانی دیمەشق، ئەگەری شەڕ کراوە دەبێت.
جێبەجێنەکردنی ڕێککەوتنەکەی ئازار
هاکان فیدان، وەزیری دەرەوەی تورکیا لە کۆنفرانسی “خۆکۆکردنەوە و بونیادنانی سووریا” لە ئەنقەرە ئاشکرای کرد، لەگەڵ حکومەتی سووریا هاوڕان لەسەر ئەوەی هەسەدە هیچ هەنگاوێکی کردەیی بۆ جێبەجێکردنی ڕێککەوتنی 10ـی ئازاری 2024 نەناوە.
فیدان گوتی: “لە دەوحە لەگەڵ هاوتا سووریاییەکەم قسەم کرد و ئەویش جەختی کردەوە کە هیچ پێشهاتێکی ئەرێنی لەوبارەیەوە ڕووینەداوە.”
“ناکرێت وڵات دوو هێزی چەکداری هەبێت”
وەزیری دەرەوەی تورکیا پەیامێکی ڕاستەوخۆی ئاراستەی یەپەگە کرد و ڕایگەیاند، پێویستە ئەوە ببینن کە لە وڵاتێکدا ناکرێت دوو هێزی چەکدار هەبێت.
فیدان دەڵێت: “ڕێگەی بەدیهێنانی سەقامگیری، تێکەڵبوونی دەستبەجێی هەسەدەیە لەگەڵ سووریا و دەبێت چەک و هێزەکانیان بچنە ژێر فەرمانی دەسەڵاتی دیمەشق.”
مەترسیی شەڕ و دەستوەردان
فیدان هۆشداریی دا ئەگەر ئەم تێکەڵبوونە ڕوونەدات، ئەوا “مەترسیی شەڕ و دەستوەرادنی دەرەکی ئەگەرێکی کراوە دەبێت.”
هەروەها جەختی کردەوە کە تورکیا دەیەوێت پرۆسەکە بە ئاشتی و گفتوگۆ چارەسەر بکرێت، چونکە شەڕ لە بەرژەوەندیی هیچ لایەکدا نییە، بەڵام پێویستە یەپەگە بڕیاری خۆی بدات.
