قەندیل پرێس
یەکەم کۆبوونەوەى شاندى دیمەشق لەگەڵ بەرپرسانى هەسەدە، بۆ جێبەجێکردنى رێککەوتنى نێوان مەزڵوم عەبدى و ئەحمەد شەرع لە رۆژئاواى کوردستان بەڕێوەچوو، هەردوولا جەختیان لە یەکگرتوویى خاکى سووریا کردەوە.
حسێن سەلامى سەرۆکى لیژنەکەى حکومەتى سووریا بۆ جێبەجێکردنى رێککەوتنى نێوان مەزڵوم عەبدى و ئەحمەد شەرع رایگەیاند، کۆبوونەوەکە بە ئامادەبوونی مەزڵوم عەبدی، فەرماندەی هێزەکانی سووریای دیموکرات و بەرپرسانی ئەمریکی، لە بنکەی سەربازی لە بارەگاى هێزەکانى ئەمریکا لە شارۆچکەی شەدادی لە حەسەکە ئەنجامدراوە.
حسێن سەلامى، بە تەلەڤزیۆنى فەرمیى سووریاى راگەیاند، شاندەکەى حکومەتی کاتیی سووریا و بەرپرسانى هەسەدە لە کۆبوونەوەکەدا جەختیان لەسەر یەکگرتوویى خاکى سووریا کردووەتەوە بەبەشداریى سەرجەم پێکهاتەکان.
سەرۆکى لیژنەى حکومەتى سووریا ئاماژەى بەوەشکرد، لە کۆبوونەوەکەدا هەردوولا رێککەوتوون لەسەر پێکهێنانی لیژنەیەکی کاری هاوبەش و تایبەتمەند کە لە سەرەتای مانگی نیسانی داهاتووەوە دەست بە کارەکانی بکات.
گوتیشى، باکوور و رۆژهەڵاتى سووریا بەشێکى گرنگە لە وڵاتەکەیان و هەر پرسێک پەیوەستبێت بەم بابەتەوە، پرسى گشتییە و بەشێکى دانەبڕاوە لە سووریا.
رۆژى 19ـى ئازارى 2025، شاندێکى حکومەتی کاتی سووریا بۆ گفتوگۆکردن لەگەڵ بەرپرسانى هەسەدە، گەیشتە پارێزگاى حەسەکەى رۆژئاواى کوردستان، بەمەبەستى جێبەجێکردنى رێککەوتنى نێوان مەزڵوم عەبدى و ئەحمەد شەرع.
بڕیارە هەشت لیژنەی تایبەتمەند کە هەریەکەیان لە پێنج کەس پێکدێن، بۆ جێبەجێکردنی خاڵەکانی رێککەوتنی عەبدی و شەرع پێکبهێنرێن، کە سەرپەرشتیی دۆسییەکانی وەک؛ ئابووری، سیاسی و سەربازی و پەروەردە، زیندانیان و نەوت و گاز دەکەن.
