قەندیل پرێس
بەڕێوەبەرایەتیی خۆسەر لە باکوور و رۆژهەڵاتی سووریا، رەخنە لە راگەیاندنە دەستوورییەکەی سووریا دەگرێت و بە پەیڕەوکردنی پێوەرەکانی سەردەمی بەعس و رەچاونەکردنی فرەیی وڵاتەکە ناویدەبات و دەڵێت، گوزارشتە لە بیرکردنەوەیەکی تاکڕەوانە.
بەڕێوەبەرایەتیی خۆسەر لە راگەیەندراوێکدا دەڵێت، راگەیاندنى دەستووری پەسەندکراو، جارێکی دیکە پێچەوانەی دۆخی راستەقینەی سووریایە و گوزارشت لە پێکهاتە جیاوازەکانی وڵاتەکە ناکات.
ئەم راگەیەندراوەی بەڕێوەبەرایەتیی خۆسەر و رەخنەگرتنی لە راگەیاندنی دەستووری، تەنیا دوای چوار رۆژ لە واژۆکردنی رێککەوتننامەی نێوان مەزڵوم عەبدی، فەرماندەی گشتیی هێزەکانی سووریای دیموکرات و ئەحمەد شەرع، سەرۆکی قۆناغی راگوزەری سووریا دێت.
هەر لە راگەیەندراوەکەدا هاتووە، سووریای ئەمڕۆ پێویستی بە یەکڕیزی و یەکپارچەیی رۆڵەکانی وڵاتەکە هەیە، بۆ بڕیاردان لە داهاتووی خۆیان و بەشدارییکردنێکی نیشتمانییانە لە هاوبەشێتی وڵاتدا.
بەڕێوەبەرایەتیی خۆسەر، جەختلەوە دەکات ئەو راگەیەندنە دەستوورییە پێوەرەکانی فرەیی نیشتمانیی سووریای تیادانییە، هەروەها رەچاوەی بەشداریی راستەقینەی پێکهاتەکانی وڵاتەکە ناکات و سەرلەنوێ دووبارەکردنەوەی بیرکردنەوەی تاکڕەوانەیە و درێژکراوەی دۆخی پێشووە، کە بوو بە هۆکارى شۆڕشی گەل.
هەر لە راگەیەندراوەکەدا، بەڕێوەبەرایەتیی خۆسەر دەڵێت “ئەم راگەیاندنە دەستوورییە گوزارشت لە خواستەکانی گەلەکەمان ناکات و هەوڵەکانی بەدیهاتنی دیموکراسیەتی راستەقینە لە سووریا لەناودەبات و ناوەڕۆکەکەی دوورە لە سووریا و خواستەکانی گەلەکەی”.
بەڕێوەبەرایەتی خۆسەر دەشڵێت، دەستووری راستەقینە، ئەو دەستوورەیە تەواوی پێکهاتەکان تیادا بەشدار دەبن و لەسەری رێککدەکەون، چونکە ئاڕاستەی دیموکراسی هەمیشەیی بۆ داهاتووی سووریا و نەوەکانی دیارییدەکات و هیواخوازین نەمانگەڕێنێتەوە بۆ خاڵی سەرەتا.
ئەم راگەیاندراوە لەکاتێکدایە، پێنجشەممە 13ـی ئازار، ئەحمەد شەرع راگەیاندنی دەستووری قۆناغی راگوزەری پەسەند کرد، کە تیادا باسی مافی نەتەوە و پێکهاتەکانی تیادانەکراوە و ناوی وڵاتەکە بە کۆمارى عەرەبی سووریا و زمانی فەرمی بە زمانی عەرەبی دیارییکردووە.
