قەندیل پرێس
دەوڵەت باخچەلی، سەرۆکی پارتی بزووتنەوەی نەتەوەیی (مەهەپە) لە کۆبوونەوەی فراکسیۆنی پارتەکەیدا، پشتیوانیی تەواوی خۆی بۆ سەردانی شاندێکی پەرلەمانتاران بۆ دوورگەی ئیمراڵی و دیدار لەگەڵ عەبدوڵا ئۆجەلان دەربڕی و بە “پێشهاتێکی مێژوویی” وەسفی کرد.
گرنگیی ئیمراڵی لە پرۆسەکەدا
باخچەلی بە ئاشکرا ئۆجەلانی وەک کارەکتەری سەرەکیی قۆناغەکە ناساند و ڕایگەیاند:
بۆ ئامانجی تورکیای بێ تیرۆر، ئیمراڵی یەکێکە لە “جددیترین موخاتەبەکانی پرۆسەکە”.
بڕیاری لیژنەی “هاودەنگیی نیشتمانی، برایەتی و دیموکراسی” بۆ ناردنی شاندەکە، بڕیارێکی دروست بووە.
پێکهاتەی شاندەکە و هەڵوێستی لایەنەکان
سەبارەت بەوەی کێ سەردانی ئیمراڵی کردووە و کێ ڕەتی کردووەتەوە، باخچەلی زانیارییەکانی خستەڕوو:
بەشداربووان: نوێنەری هەریەکە لە (مەهەپە، ئاکپارتی و پارتی دەم) لەناو شاندەکەدا بوون و چوونەتە دوورگەکە.
بایکۆتکردن: جەهەپە و پارتەکانی دیکە خۆیان بەدوور گرتووە. باخچەلی لەوبارەیەوە گوتی: “چی دەکەن با بیکەن، ئەگەر گوێمان لە قسەی ئەوان بگرتایە، باسی پرسێکی وا سەختمان نەدەکرد”.
وەڵامی ئەوانەی دژن
لە وەڵامی ئەو نەیارانەی کە دژایەتیی پرۆسەکە دەکەن و هەڕەشەی دادگاییکردنی لێ دەکەن، باخچەلی پەیامێکی توندی ئاڕاستە کردن: “ئەگەر ئارامی، ئاشتی و خۆشگوزەرانی باڵ بەسەر تورکیادا دەکێشێت، با من لە سێدارە بدرێم”.
