ئەردۆغان: لەگەڵ ترەمپ و شەرع کۆدەبمەوە و سووریا بەتەنیا بەجێناهێڵین

رەجەب تەیب ئەردۆغان، سەرۆککۆماری تورکیا، پێش بەڕێکەوتنی بۆ ئەمریکا بە مەبەستی بەشداریکردن لە کۆبوونەوەی نەتەوە یەکگرتووەکان، لە کۆنفرانسێکی رۆژنامەوانیدا رایگەیاند، کە هەرگیز سووریا بەتەنیا بەجێناهێڵن و لەپێناو بەهێزبوونی سووریا، هەرچییان لە توانادا بێت بەکاریدەهێنن.

کۆبوونەوە لەگەڵ ترەمپ و شەرع
ئەردۆغان ئاماژەی بەوەشکرد، رۆژی پێنجشەممە، لەگەڵ دۆناڵد ترەمپ سەرۆکی ئەمریکا کۆدەبێتەوە. هاوکات لەگەڵ ئەحمەد شەرع و چەند سەرۆکێکی دیکەدا کۆدەبێتەوە، کە نیشانەی چالاکییە دیپلۆماسییەکانی تورکیایە لەسەر ئاستی نێودەوڵەتی.

پابەندبوونی تورکیا بە سووریاوە
سەرۆککۆماری تورکیا، رەجەب تەیب ئەردۆغان، لە درێژەی قسەکانیدا گوتی: “رۆژی سێشەممە لە نەتەوە یەکگرتووەکان وتارم دەبێت. لە قەتەڕ لەگەڵ ئەحمەد شەرع کۆبوومەوە، لە میانەی کۆبوونەوەکانم لە ئەمریکاش، لەگەڵ شەرع کۆدەبمەوە و لە داهاتووشدا لە ئەنقەرە جارێکی دیکە کۆدەبینەوە. ئێمە سووریا بەتەنیا بەجێناهێڵین و ئەوەی لەدەستمان بێت و لە تواناماندا بێت بۆ زیاتر بەهێزبوونی سووریای دراوسێمان بەکاریدەهێنین.”