قەندیل پرێس
بڕیارە ئەمڕۆ شاندی ئیمراڵی بۆ دەیەمین جار لە ماوەی 11 مانگی ڕابردوودا سەردانی دوورگەی ئیمراڵی بکەن و لەگەڵ عەبدوڵا ئۆجەلان کۆببنەوە. لەم دیدارەدا کە گرنگییەکی تایبەتی هەیە، سێ تەوەری سەرەکی و چارەنووسساز دەخرێنە بەر باس و گفتوگۆ.
ناوەڕۆکی کۆبوونەوەی ئەنقەرە
ئەم سەردانە دوای دیدارێکی گرنگی شاندەکەیە لەگەڵ ڕەجەب تەیب ئەردۆغان، سەرۆککۆماری تورکیا کە لە ڕۆژی 30ـی تشرینی یەکەم بەڕێوەچوو. بەپێی زانیارییەکان، شاندەکە پوختە و ناوەڕۆکی دانیشتنەکەیان لەگەڵ ئەردۆغان بۆ ئۆجەلان دەگوازنەوە، کە ئەمەش بە هەنگاوێکی گرنگ دادەنرێت لە پرۆسەکەدا.
ئامادەکارییەکانی پارتی دەم بۆ قۆناغی نوێ
تەوەرێکی دیکەی گرنگی کۆبوونەوەکە، گفتوگۆکردنە لەسەر ئامادەکارییە یاساییەکانی پارتی دیموکراسیی و یەکسانیی گەلان (پارتی دەم) بۆ “قۆناغی ڕاگوزەر”. شاندەکە لەمبارەیەوە ڕاوێژ بە ئۆجەلان دەکەن و دوا پێشهاتەکانی بۆ باس دەکەن تا نەخشەڕێگای داهاتوو دیاری بکەن.
سەردانی چاوەڕوانکراوی لیژنەی پەرلەمان
هەروەها، شاندەکە لەگەڵ ئۆجەلان تاوتوێی ئەگەری سەردانی لیژنەیەکی پەرلەمانی تورکیا دەکەن بۆ دوورگەی ئیمراڵی. گفتوگۆ لەسەر ئەوە دەکرێت کە لەو دیدارەدا باس لە چ بابەتێک بکرێت و چۆن مامەڵە لەگەڵ لیژنەکەدا بکرێت بۆ گەیشتن بە ئەنجام.
وێستگەکانی پرۆسەی ئیمراڵی
دیدارەکانی شاندی ئیمراڵی دوای ئەوە دەستیپێکردەوە کە دەوڵەت باخچەلی، سەرۆکی مەهەپە لە تشرینی یەکەمی ساڵی ڕابردوودا داوای دەستپێکردنەوەی کرد. یەکەمین دیدار دوای زیاتر لە 13 ساڵ، لە 28ـی کانوونی یەکەمی 2024 بەڕێوەچوو. سەردانەکان بە شێوەیەکی مانگانە ئەنجام دەدرێن و دوایین سەردانیش ڕۆژی 3ـی تشرینی یەکەمی ڕابردوو بوو.
